25 mil ka tawo mitambong sa ‘Sugat’

Bisan pa sa pagbunok sa uwan nagdasok kagahapon sa kaadlawon sa mga tawo kinsa mitambong sa ika-150 nga "Sugat sa Minglanilla" nga gihimo sa hawanan sa Barangay Poblacion Ward I Central School sa nahisgutang lungsod diin uban sa mga mitambong wala na makasulod sa tunghaan.

Sa wala pa ipahigayon ang Sugat sa imahen ni Birhen Maria ug sa iyang anak nga si Hesus gipahigayon una ang santos nga misa ni Monsignor Esteban Binghay, kura paroko sa parokya.

Ang santos nga misa gisugdan sa alas 3 sa kaadlawon ug natapos kini mga usa ka oras.

Si Binghay sa iyang sermon nagkanayon nga ang dugo mas bug-at kay sa tubig ug bisan gani sa politika ang kadugo o paryente modapig gyud sa iyang kadugo nga politiko bisan og minus kini og kinaadman.

Si Binghay nanghinaot nga ang matag tawo mahimo kining usa ka kahimanan para mahimong magmalambuon ang katilingban.

Mga alas 4 sa kaadlawon human sa misa gisugdan dayon ang kalihukan sa sugat diin ang University of Cebu Dance Troupe ang mipahigayon sa dramatization sa away ni San Miguel arkanghel ug sa mga higante nga Agila nga sakop sa kangitngit.

Human mapildi ni San Miguel kinsa pangulo sa mga "quiruben" ang mga higanteng Agila nanganaog ang mga anghel gikan sa kapunawpunawan ug nahitabo ang panagtagbo ni Birhen Maria ug sa iyang anak nga si Hesus.

Napulo ka mga bata ang gibitay nga gihimong mga "Quiruben" ug upat ka dalagita nga gihimong anghel kinsa usa kanila ang mitangtang sa panapton nga itom nga gitabon sa rebolto ni Birhen Maria.

Si Victor Cuenco, Director Choreographer mibutyag sa mga tigbalita nga 70 ka bata nga pulos taga Minglanilla ang ilang gikuha para mohimo sa papel sa mga keruben diin ang uban niini gipatong sa mga taas nga hagdanan ug nanabwag og mga buwak ug ang uban diha sa ubos ang nagdala og mga trumpeta nga maoy silbing nagpahibaw nga nabanhaw na ang Ginoong Hesus sa ilang gipahigayong palabas sa Sugat.

Mikabat sa 30 minutos ang maong presentasyon diin aduna usab kini mga fireworks.

Si Concordio Mejias, konsehal sa lungsod mibana-bana nga mikabat sa 25 mil ka tawo ang mitambong sa nahisgutang kalihukan.

Ang mga sakop sa Regional Mobile Group, (RMG), Police Training Personnel (FTP), Reservist sa Philippine Army sa Central Command, mga tanod sa lugar ang gipakatap para pagmentenar sa kahapsay ug kalinaw.

Apan nabantayan sa mga tigbalita nga ang karo nga gisakyan sa rebulto ni Birhen Maria ug Ginoong Hesus nahawan ang mga gidayan-dayan niining mga buwak tungod kay gitapok-an kini sa mga tawo ug gipanglabni ang mga buwak niini human sa sugat.

Kagahapon sa udto gisugdan usab ang pagsaulog sa Kabanhawan Festival sa lungsod diin lakip sa ilang ipahigayon ang street dancing, lumba sa kabaw, mud volleyball ug panghatag og pasidungog sa mga taga Minglanilla kinsa nakahatag og dungog sa ilang lungsod.