Ang namatay diha na sa tambalanan giilang si Arnulfo Torrejos Flores,Jr. tindero og mga lagutmon kinsa gikan naninda og mga snacks diha sa Good Sheperd sa Banawa, Guadalupe dihang nahitabo ang pagpanunggab.
Sa imbestigasyon nila ni SPO3 Rey Cuyos sa Homicide Section ang biktima ug mga kaubanang tindero nga sila si Arnelyn Ylaya,19 iyang kapuyo ug Jimmy Po,22, nga taga Tisa, silingan sa biktima padulong na pauli gikan sa Good Sheperd dihang giatangan og duha ka wala mailhing mga lalaki pag-abot nila diha sa Phase 3, sitio Kadasig sa Tisa.
Ang mga suspek gikatahong mipasangil kanila sa pag-ingon nga ‘kamo tong nangatang namo?’ dayong walay pahimangno nga midunggab kang Flores diha sa walang bahin sa lawas.
Daling gidala ang biktima sa Cebu City Medical Center apan dangtan pila ka gutlo nakabsan gyud kini sa kinabuhi.
Samtang sa laing bahin usa ka 15 anyos nga lalaki nga niuban sa panon sa prusisyon diha sa dalan Spoliarium sa Duljo-Fatima ang kalit nga gidunggab sa duha ka wala mailhing mga lalaki nianan pagkagabii sa adlawng Biyernes.
Ang naangol giilang si Junard Lumupak,15, taga dalan J.Basa sa San Nicolas. Matud pa sa biktima sa Homicide Section nag-uban sila ni Lito Yamomo, usa ka Wendel ug Melody sa prusisyon dihang kalit nga giduol sa mga suspek dayon ang usa midunggab sa iyang likod makausa ka higayon dayong midagan palayo.
Ang biktima gidala dayon sa CCMC ug luwas na ang kahimtang samtang gipangita pa ang mga suspek.