Malinawong eleksyon awhag ni Vidal

Si Arsobispo Ricardo Cardinal Vidal sa iyang mensahe sa Domingo sa kabanhawan sa Ginoong Hesukristo miawhag sa publiko nga magbinantayon ug magbaton og kinaadman sa ilang pagbotar ug mahimong hapsay ang umaabot nga eleksiyon para mausab ang dagway sa dagan sa katilingban.

Ang Arsobispo nanghinaot nga malinawon unta ang pagpahigayon og pagpangampaniya sa mga politiko ug adunay tinuoray nga kagawasan ang mga botante atol sa ilang pagbotar.

Matud ni Vidal nga magsubay unta sa lagda sa hustisya ug sugo sa gugma ang mopahigayon sa pag-ihap sa mga balota.

Ang Cardinal nanghinaot usab sa mga kandidato nga tinud-anay ang pagpakabana niini sa kaugmaon sa tanan ug ang mga botante magbaton usab og limpiyo nga konsensiya sa dili pa ug inig ka human sa piniliay karong Mayo.

Si Vidal midungag nga ang pahalipay nga iyang gipaabot ngadto sa katawhan tungod sa Domingo sa pagkabanhaw dili lang kini para karon apan hangtod sa Domingo sa Pentecostes.

Ang Archdiocese sa Sugbu kanunay usab nga mipahigayon og mga pag-ampo para mahimong hapsay ug linaw ang umaabot nga piniliay.

Gipanghinaot usab sa ilang mga pag-ampo nga ang mga kandidato matinud-anon sa ilang mga tumong para sa kaayohan sa tanan ug ang mga botante magbaton usab og kinaadman ug konsensiya sa ilang pagbotar.