Aliwan festival gipangandaman sa Sugbu

Subling mopadala og contingent ang kagamhanan sa dakbayan sa Sugbu sa tinuig nga selebrasyon alang sa kompetisyon sa Aliwan Festival nga ipahigayon didto sa Manila karong Abril 26 hangtod sa 28.

Ang defending champion sa Aliwan Festival sa milabay'ng tuig nga mao ang Lumad Basakanon ug kampiyon usab sa milabay'ng Sinulog mardi gras dinhi sa dakbayan niadtong bulan sa Enero maoy ipadala sa siyudad aron mosalmot sa Aliwan Festival.

Atol sa sesyon sa konseho kagahapon sa buntag gi-aprobahan niini ang P703,958.86 nga gahin nga gipasalig ni Mayor Tomas Osmeña nga abagahon sa siyudad alang sa ilang mga gastuhan.

Si Konsehal Jocelyn Pesquera maoy mipalabang sa resolusyon aron aprobahan ang gipangayo nga gahin sa mayor alang sa maong kompetisyon.

Si Osmeña mitugot nga makapadala og mga contingent ang siyudad sa Aliwan Festival tungod kay naatol ang maong selebrasyon nga bakasyon na ug walay klase nga dili na mabalda ang pagtuon sa mga batan-on.

Ang gahin nga gi-aprobahan sa konseho nga gitagana alang sa gastuhan sa pletehan sa mga contingent gikuha kini gikan sa share sa siyudad sa Pagcor funds.