Ang nangamatay giilang sila si PO2 Jessie Yramis,sakop sa San Nicolas Police station sa Cebu City Police Office ug Sgt. Darwin Basico, sakop sa Philippine Air Force ug nadestino sa Benito Ebuen Airbase ug residente sa Sawang Calero ning dakbayan.
Sa imbestigasyon sa Homicide Section gikatahong nag-inom si Basico uban nila ni Arnel Jurado,34, ug Renato Paon, 34, mga silingan sa sundalo diha sa 7E Antigua Restaurant and Videoke sa nahisgutang lugar nga dili molapas 50 metros gikan sa Barangay Hall sa San Nicolas ug di molapas 100 metros gikan sa San Nicolas police station.
Subay sa gitug-an sa mga kainom ni Basico, miabot ang asawa niini nga si Ana Liezel ug gipapauli na kini apan giingong miinsister ang bana nga hutdon lang una ang ikaduhang botelya sa beer.
Nianang tungora gikatahong miabot si Yramis ug gisitar si Basico tungod sa pagloklok niini og armas apan gikatahong mitubag kini nga sakop siya sa PAF maong gitubag kini ni Yramis og "Wa tay unay."
Si Inspector Mario Monilar hepe sa Homicide Section mitug-an sa Banat News nga si Yramis miadto sa maong establisamento aron pagtubag sa "armed person alarm" diha sulod sa maong imnanan maong girekisa niya ang mga tawo didto.
Base sa pamahayag ni Paon, ang asawa ni Basico gikatahong pagkakita sa gibuhat ni Yramis daling mitulisok sa naulahi maong gitapi sa polis ang kamot niini apan giingong gikasuko kini ni Basico ug gihapak usab ang kamot sa polis.
Ning tungura nasukmagan ni Yramis ang PAF ug nahitabo ang tinukmuray hangtud nga misangpot sa pagbunotay og armas dayong nagpinusilay.
Apan sa laing bersyon usab ni Jurado ngadto kang Monilar, gikatahong si Yramis maoy mitulisok sa asawa ni Basico dungan sa pagpangutana kung unsay problema apan giingong gikasuko kini ni Basico ug gitapi ang kamot ni Yramis nga miresulta sa panag-away ug nasundan sa pinusilay.
Gikatahong naabot sila sa gawas dihang nagtinukmuray ug diha na mahitabo ang sinukliay og buto sa armas diin silang duha parehong nangaigo.
Si Monilar nagkanayon wala pay nakatumbok kung si kinsa maoy unang nipabuto sa armas ug kung kinsay nagsulti sa tinuod sa duha ka mga kauban ni Basico.
Wala pa usab matino kung si kinsay sad-an kanilang duha sanglit wala pa makahatag og pamahayag ang asawa ni Basico nga diha sa pagkahitabo ug uban pang posibleng mga testigos nianang gabhiuna.
Wala pa usab matino kung si Basico duna bay Comelec Gun Ban Exemption sa iyang pagdala-dala og armas, apan matud pang Monilar base sa patakaran gikinahanglang dad-on sa usa ka indibidwal nga gihatagan og exemption ang dokumento gikan sa Comelec bisan asa pa siya moadto kung dala niini iyang armas panahon sa election period.
Si Yramis naigo diha sa tuong bukton ug walang bahin sa dughan daling gidala sa Mobile Patrol Group car 017 sa Chong Hua Hospital samtang si Basico gidala usab sa MPG car 014 sa Cebu City Medical Center apan ang duha parehong nakabsan sa ilang mga kinabuhi pipila ka mga minutos ang milabay.
Nakuha sa grupo sa Scene of the Crime Operation-7 pinanguluhan ni SPO1 Reynaldo Ramos ang usa ka kalibre .38 service revolver ni Yramis ug unom ka basiyo sa .38 nga bala, usa ka .45 kalibre pistolang Remington, duha ka magazine sa kalibre .45, unom ka basiyo niini nga gipanag-iya ni Basico.
Dugang narekober ang usa ka deformed slug, usa ka metal fragment ug mga ID ni Basico isip sakop sa Armed Forces of the Philippines ug sa PAF, Philhealth ID ug usa ka PAF ID nga may pangalan ni Orlando Liston.
Si Supt. Marciano Batiancela,Jr. hepe sa San Nicolas police station sa pakighinabi sa Banat News pinaagi sa telepono mitug-an nga ang Homicide Section nalang maoy ilang pabut-on sa maong kaso.
Samtang si Abesia nga maoy miresponde diha sa nahitaboan dili makontak sa iyang telepono dihang buot kuhaan og pamahayag kabahin sa hitabo.