Miuntol nga tseke ni Guardo iyang bayran

Gipasalig ni congressional aspirant Jonathan Guardo ngadto sa LBC Cargo Center sa may Mactan International Airport nga iyang bayran ang utang niini nga mokabat sa 150 mil pesos human usab mi-untol ang tseke nga iyang giisyu niadtong Mayo 20, 2006 gumikan kay wa na kiniy pundo.

Kahinumduman nga niadtong petsa 28 sa Marso sa miaging bulan usa ka Dondie Bojos, representante sa LBC Mactan misang-at og kasong kalapasan sa Batas Pambansa BP.22 kun kalapasan sa pag-isyu og tseke nga wa nay pundo.

Gidemanda sa kompaniya ni Bojos gumikan usab sa kagahi nga mobayad ni Guardo labot sa maong utang bisan paman sa pipila na ka demand letter ang ilang gihatag.

Si Guardo dihang nahinabi sa Banat News miingon nga iya nang-gimanduan ang iyang mga abogado nga bayran na ang maong mga utang ug sa pagpakig-sabot sa mga reklamante.

Giangkon usab niini nga wa gyud niya gilayon mahimo-i og dinaliang aksyon hinungdan nga nasakyan na hinuon sa isyu sa politika ang iyang utang diin para kaniya kaya niyang bayran gumikan sa kagamay sa maong kantidad.

Gisalikway usab niya ang mga pagduda nga ang iyang kahigpit nga karibal sa politika sa south district sa dakbayan Kongresista Antonio Cuenco maoy nagpaluyo sa maong kontrobersya.

Matud pa niini nga dili siya magtuo nga si Cuenco maoy nagmani-obra kun dili usa lamang kini niya ka sayop nga wa lang gyud mabayri gilayon.

Dugang pa niini nga bisan paman sa maong hitabo wa niya hatagig igong pagtagad gumikan kay makabayad siya niini ug gani sa iyang lantaw kun aduna may negative impact sa iyang kandidatura ang maong kaso dili momenos lima lang ka boto ang mawagtang ngadto kaniya.