Tsinoy gipatay su'd sa awto

Patay nang napalgan ang usa ka negosyanteng Filipino-Chinese sulod sa iyang sakyanan nga may samad pinusilan sa lawas kagahapon diha sa dalan Jaime sa Barangay Guizo duol sa Metrobank sa dakbayan sa Mandaue.

Ang biktima giilang si Jayvee Chang, 22, residente sa Labangon kinsa gikatahong niadto pang adlaw'ng Lunes sa gabii wala na mahiuli sa ilang balay.

Ang biktima napalgang patay diha sa backseat sa iyang awto nga Honda Civic kolor blue nga may plakang YEG-719, nakuha sa mga imbestigador ang usa ka basiyo sa kalibre 45 nga bala, usa ka Swiss knife ug mga dokumento.

Ang mga sakop sa TEDMAN nga nadestino sa maong dapit maoy naalarma sanglit ikaduhang adlaw na nilang nakit-an ang giparking nga sakyanan apan dihang giduol nakugang sila tungod sa nag-agas nga dugo gikan sa sakyanan.

Wala pa matino sa mga imbestigador kung kinsa ang mamumuno sa biktima ug sa motibo niini, si Chang gikatahong nalambigit sa 'buy and sell' nga negosyo sa mga sakyanan.

Apan sumala pa sa report nga si Chang ulahing nakit-ang buhi niadtong Lunes sa gabii uban sa iyang mga kabanay nga nanihapon apan milakaw kini ug wala na makauli.

Gikatahong gisuwayan og tawag sa iyang mga kabanay si Chang diha sa telepono apan gikatahong "out of coverage area" na ang maong telepono maong nabalaka sila sa kahimtang niini ug midangop sa buhatan sa National Bureau of Investigation aron magpatabang.

Si NBI-7 director, Medardo de Limos, nga suod nga higala sa mga Chang nagkanayon nga ang inahan ni Jayvee nga si Bea maoy midangop kaniya.

Lakip sa mihimo na og imbestigasyon mao ang intelligence unit sa Police Regional Office aron makit-an si Chang.

Nagduda ang mga sakop sa SOCO nga molapas na 24 ka oras namatay si Chang una pa kini mapalgi sanglit nagsugod na kini og kadugta ug nanimaho na.

Matud pang De Limos imbitaron nila ang pipila sa mga higala ni Chang aron makahatag og dugang pamahayag ug makakuha og mga impormasyon nga posibleng magamit sa pagsulbad sa kaso.

Ang maong sakyanan niadtong Martes pasado alas 12:59 sa udto gi-flash na sa Police Hotline 166 sa Mobile Patrol Group nga kung makit-an pababagan kini.

Wala hinuon maklaro kung unsay hinungdan nga gipa-blotter kini sanglit sumala pang Angelo Sambo, ang base control operator sa MPG, matud niya base sa ilang blotter gipanag-iya kini ni Jayvee Chang nga taga Tres de Abril, Labangon.

Si Mandaue City Police Office director, Sr.Supt. Alexander Abadinas sa pakighinabi sa Banat News nagkanayon nga molapas na og usa ka adlaw nga nagparking ang maong sakyanan diha sa maong dapit.

Dili sad makita ang sulod sa maong sakyanan gumikan kay tinted man kini apan kagahapon nahibulong na sila sanglit wala gihapon kini kuhaa maong mitawag nalang kini og polis.

Ang NBI-7 na maoy mopadayon sa imbestigasyon sumala pang Abadinas.