Murder sa Citom ipadali og sulbad

Giawhag sa mga opisyal sa dakbayan sa Sugbo ang kapolisan sa siyudad sa Mandaue sa pagresolbar sa labing daling panahon ug pagsikop sa mga suspetsado nga mipusil patay sa usa ka sakop sa City Traffic Operation Management (CITOM) didto sa A.C. Cortes Avenue Mandaue niadtong Lunes sa buntag.

Si Konsehal Sylvan Jakosalem maoy nangamahan sa resolusyon nga iyang gipasar ug gi-aprobahan atol sa sesyon sa konseho sa dakbayan kagahapon sa buntag.

Gikondenar sa konseho sa dakbayan ang maong pagpusil patay sa Citom enforcer nga si Romeo Muñez nga nadestino sa Task Force Franchise ug aktibo sa pagpanakop sa mga peke nga prangkisa sa sakyanan.

Gipaabot usab sa konseho ang ilang mga pahasubo ngadto sa pamilyang Muñez sa maong masakit nga panghitabo ug mipasalig nga motabang aron sa pagpangita sa hustisya.

Pagkakaron duna nay duha ka mga traffic investigator ang gipadala ni Citom executive director Arnel Tancinco ngadto sa Mandaue aron moabag sa gihimong imbestigasyun sa kapolisan diin usa sa gitutokan mao ang posibilidad nga may kalambigitan sa iyang trabaho ang motibo sa krimen.

Matud ni Tancinco dunay lig-ong basehanan nga magpamatuod nga posibleng gipanimaslan ang biktima sa mga drayber ug operator nga naligsan niini sa pagpatuman sa balaod sa trapiko.

Si Mayor Tomas Osmeña mimando karon nga tun-an ang posibling paghatag og trabaho sa asawa sa biktima ug ang paghatag og scholarship sa upat ka mga anak niini wala pay labot sa burial assistance nga ihatag sa siyudad.