Subdivision sa Pulangbato ning siyudad gibabagan

Gibabagan sa dul-an sa 200 ka mga pamilya nga molupyo sa Sitio Kasambagan, Pulangbato ning dakbayan sa Sugbo ang nagpadayong konstruksiyon sa Metropolis Subdivision nga iya sa Sta. Lucia Realty Development Corporation nga nahimutang sa nahisgutang lugar.

Mokabat sa 171 ka mga pamilya ang nipirma sa petisyon nga gipirmahan sa ilang presidente nga si Jeorge Agbay nga ilang giduso sa buhatan ni Mayor Tomas Osmeña niadtong Pebrero 18.

Gidemanda sa mga molupyo nga hatagan sila og tres metros nga road right of way gumikan kay nabalaka sila nga dili mahatagan og agianan sa maong kompaniya nga maoy ilang bugtong agianan kun molakaw sila paingon dinhi sa dakbayan.

Gumikan niini, gipatawag sa sesyon sa konseho kagahapong adlawa ang mga opisyal sa Sta. Lucia ug gisukitsukit kini kabahin sa maong giduso nga reklamo sa mga molupyo.

Si Konsehal Arsenio Pacaña mipahimangno nga pabor siya sa mga kalambuan nga mugnaon apan iyang gipanghinaot nga dili ma-apektuhan ang nindot nga palibot sa kinaiyahan sa matag development nga himuon.

Si Engr. Rowena Saavedra representante sa Sta Lucia mipasabot sa konseho nga ilang sundon ug tumanon ang tanang mga lagda nga gipatuman sa dakbayan katugotan lang nga makapadayon ang konstruksyon sa ilang proyekto.

Hinuon gipasabot ni Bise-Mayor Michael Rama nga ila lang gustong maseguro nga matimbangtimbang og maayo aron mabalanse ang interes sa matag habig ilabi na gyud sa mga nangreklamong molupyo. - Darrel A. Carumba Anak sa retiradong polis namusil Ni Brenda Batuto

Kritikal ang kahimtang sa usa ka 29-anyos nga lalaki human kini pusila sa anak sa retiradong polis gamit ang kalibre .45 nga pistola niadtong Martes sa gabii diha sa Poblacion, Talisay.

Ang suspetsado nalandig usab sa tambalanan tungod kay gibunal-bunalan ug giluba usab siya og botilya sa biktima.

Ang biktima giila sa mga polis nga si Benjamin Co, temporaryong nagpuyo diha sa dalan Tres Aliños sa nahisgutang barangay kinsa nakaangkon og samad pinusilan sa iyang dughan ug daling gidala diha sa Chong Hua Hospital apan gibalhin kini diha sa Cebu Doctors Hospital.

Ang suspetsado giila usab sa mga polis nga si Joey Juguete, 36, residente usab sa nahisgutang barangay usa ka kahni record holder sa swimming ug anak sa usa ka retiradong polis.

Si Juguete nakaangkon og samad sa walang bahin sa ulo, walang nawong ug bukton dali usab kining gidala sa mga polis diha sa Talisay District Hospital apan tungod sa kahimtang niini gibalhin sa Vicente Sotto Memorial Medical Center.

Si PO2 Harrison Quiñanola sa Talisay Police Station kinsa usa sa miresponde sa maong insidente mibutyag kagahapon sa Banat News si Juguete hubog nga miduol ni Co ug sa kauban niining si Christian Alpe nga nag-inom.

Matud ni Quiñanola nga nagkasa-kasa sa dala niining pusil si Juguete apan giingnan kini ni Co nga "peke man yan."

Nahagit si Juguete sa maong gisulti ni Co ug nagkanayon usab kini nga "yawa ra peke gud" dayon gipusil niini si Co.

Si Co human maigo sa bala mibawos ni Juguete og bunal og botelya ug dunggab hangtod nga nahitabo ang linayogay tungod kay nag-inilogay na ang duha sa pistola.

Si Quiñanola mitataw nga naabtan nila si Joey nga naglingkod nga naghukdong nga naligo na sa iyang dugo usa ka metros ang gilay-on gikan sa lugar nga nahitaboan ug wala na niini ang gidalang pistola.

Si Quiñanola midungag nga tungod sa kamahal sa bayronon sa mga pribadong tambalanan gikan sa Cebu Doctors Hospital gibalhin diha sa VSMMC si Co apan gibalik kini pagpagawas sa mga nagdala niini tungod kay nagkatapad kini og higdaanan ni Juguete.