Luwas nga bakasyon gipasalig sa DOTC

Ang ahensya sa panakyanan sa gobyerno higpit nga mobantay sa kaliboan ka mga bakasyonista nga mopanaw ning panahon sa Semana Santa matud pa ni Assistant Secretary Thompson Lantion sa Department of Transportation and Communication (DOTC).

Kining maong tahas maoy pagtuman sa mando ni Presidente Gloria Macapagal Arroyo pagsiguro nga way unsa mang dautang mahitabo sa mga terminal, tugpahanan ug pantalan sa tibook nasud diin magdasok ang mga biyahidor nga moadto-anhi, matud pa ni Lantion.

Si Lantion nga mao usay tsirman sa Land Transportation Franchising and Regulatory Board (LTFRB) miingon nga ang tanang terminal giandam na nila sa wala pa ilusad kining Kalakbay 2007 nga may tema nga "Oplan GT" (Gabay sa Taongbayan).

Ang maong programa gitumong sa pagbantay sa mamaa kon yuta, kahanginan ug kadagatan batok sa mga tawong mapahimuslanon ning panahon sa Semana Santa gikan sa Abril 2-8, 2007.

Si Lantion kinsa usa ka kanhi police general nagkanayon nga sulod ning semanaha ikatagkatag sa DOTC ug LTFRB ang mga monitoring team sa mga terminal sa tugpahanan, pantalan ug sa kayutaan aron ikahatag ang tukmang pangalagad ngadto sa tanang mga pasahero ug mga motorista sa nasud.

Samtang gipasalig usab ni Lantion ang abundang mga sakyanan ning mga adlawa, uban sa pakig-alayon sa mga kapolisan ug militar aron pagtino nga bisan asang lugara luwas ang publiko sa hulga sa mga terorista.

Sayo niini may hulga ang New People's Army nga molusad og pangatake ning panahon sa Semana Santa.

Apan gipakagamay kini ni Lantion tungod sa pagsalig niya nga dili mosaler dinhi sa nasud kining mga binuang sa mga rebeldeng komunista.

Midugang si Lantion nga bisan ang mga tulisan maglisod sila paglihok karon tungod sa kaigmat sa mga otoridad ning panahona.