Sparrow sa NPA nasikop

Usa ka gipasanginlang gun-for-hire nga sakop sa sparrow unit sa New People’s Army sa Davao City nga mieskapo sa prisuhan niadtong Disyembre sa milabay'ng tuig ang nadakpan og balik kagahapon sa udto sa mga sakop sa Criminal Investigation and Detection Group 7 diha sa barangay Tinago.

Ang gidakop giilang si James Bangot alyas Jimboy ug James Dublin, 25, lumad nga taga Toril, Davao City kinsa dunay warrant of arrest nga giluwatan ni RTC-11 Branch 15 Presiding judge, Jesus Cuitain tungod sa kasong murder nga walay piyansang girekomendar.

Si SPO1 Delfin Bontuyan sa CIDG-7 maoy nakadakop kang Bangot human makumpirmar sa ilang "asset" sa lugar ang presensya niini kagahapon.

Si Bangot sa pakighinabi sa Banat News nagkanayon nga niadtong Disyembre 7 sa miaging tuig mieskapo siya sa prisuhan sa CIDG-11 sa Davao City ug diri sa iyang apuhan sa Tinago mitago.

Matud pang Bangot nga gilaay siya sa maong bilanggoan sanglit tulo na ka tuig ang milabay wala gihapon mahikay ang iyang gihangyo nga mapailawom sa witness protection program sanglit buot siyang motestigo batok sa tulo ka mga kaubanan.

Si Bangot maoy usa sa upat ka mga tawong mipatay kang Dr. Agusto Alvarez niadtong Disyembre sa tuig 2002. Giila ni Bangot ang tulo ka mga kaubanan mao sila si Constancio Ambuyan; Gonzalo Villarta, nga giingong kanhi sundalo ug nahimong bodyguard kaniadto sa usa ka politiko sa Davao City, ingon man ang tawong nagpapatay sa maong doktor nga si Dario Malalis.

Gipanghimakak hinuon ni Bangot nga usa siya ka gun-for-hire ug sakop sa Sparrow sa NPA. Matud pa niya usa ra siya ka habal-habal driver nga gipakyaw nila ni Ambuyan ug Villarta sanglit iyang silingan si Villarta.

Matud pa niya si Malalis maoy mikuha sa serbisyo nila ni Villarta ug Ambuyan, apan miangkong kauban sila atol sa pagpatay sa maong doktor.

Gitug-an ni Bangot nga si Alvarez asawa ni Dr. Gina Alvarez nga maoy giingong nagpaanak sa asawa ni Malalis apan ang maong babaye namatay lakip na ang puya sa tiyan niini maong gikiha ni Malalis ang maong doktor.

Apan gikatahong gikuha usab ni Malalis ang serbisyo sa grupo ni Villarta.

Si PO1 Jerry Alquisalas sa CIDG-11 sa pakighinabi sa Banat News nga maoy gitahasang mangita kang Bangot mitug-an base sa ilang intelligence community sa Davao nga si Bangot ug mga kaubanan sakop sa Sparrow Unit sa NPA nga modawat usab og serbisyo isip gun-for-hire.

Sila si Villarta ug Ambuyan parehong nadakpan ug nakumbikto na sa kasong illegal possession of firearms samtang si Malalis nga maoy gitudlong mikuha sa ilang serbisyo gikatahong nagtago-tago pa hangtud karon.

Gikatakdang dad-on og balik si Bangot ngadto sa Davao aron paatubangon sa maong kaso.