Si Benatiro kinsa sakop sa partidong Kusog-Kandayan-on ilawom sa tiket ni Agustu "Dodong Itok" Corro, nagkanayon nga tumong niini mao ang malinawon ug malikayan ang kagubot sa umaabot nga piniliay tali sa ilang grupo ug grupo ni Loot.
Ning bag-uhay lang si Corro misaway sa kagamhanan sa maong lungsod tungod sa gihulagway niining pagpabaya nga maoy nakaingon nga midaghan ang mga illegal fishers diha sa ilang kadagatan.
Matud pang Corro nga ang naapektahan niini mao ang mga gagmay’ng mananagat sa lungsod nga diha ra magsalig og pangabuhian.
Si Corro nagkanayon nga usa kini sa mga problema sa ilang lungsod nga buot niyang masumpo kung siya mabutang sa pwesto sanglit dili niya katugutan nga usa ka batan-on ug kulang sa ekperyensiya nga si Sun Shimura nga anak ni Mayor Loot sa una niining bana nga usa ka negosyanteng Hapon maoy mogunit sa renda sa lungsod.
Si Shimura kinsa kandidato atbang kang Corro sa iyang bahin mihagit sa iyang mga kaatbang sa pagladlad sa ilang mga plataporma ug dili ang pagsige og atake sa iyang pagkatawo.
Si Shimura, 25 anyos, nagkanayon nga usa ka pagbiay-biay ang gihimo kaniya sa pundok ni Corro nga pagtawag kaniya og "Totoy" ug siya midepensa nga base sa balaud mahimo nang mokandidato ang 18 anyos sa posisyon.
Misaad si Shimura nga padayunon ang mga maayong nahimo sa iyang inahan sa panahon niini.