Nanglugos sa anak mitahan

Bulontaryong mitahan ang usa ka amahan nga gipasanginlang miunay og lugos sa iyang anak sulod sa ilang panimalay sa niaging semana sa Carcar.

Ang biktima giila nga si Inday, 12 anyos, tinuod bansagon gipugngan sa Banat News ug residente sa usa sa mga barangay sa maong lungsod.

Ang gitanggong sa detention cell sa Carcar giila sa kapolisan mao ang iyang 35 anyos nga amahan kinsa gikatahong atol nga iyang gilugos ang anak babaye naulipon kini sa ilimnong makahubog.

Si PO1 Loreto Rama nga nahinabi sa Banat News niingon nga usa ka uyoan sa biktima ang nidangop sa kapolisan ug niasoy nga niadtong Sabado sa gabii nahitabo ang pagpanglugos sa iyang pag-umangkon.

Matud ni PO1 Rama dugang sa uyoan niadtong tungora ang biktima ug suspetsado lang ang nahabilin sa panimalay hinungdan nga nilampos gyud ang paglugos.

Ang uyoan sa biktima maoy nagdala sa suspek ngadto sa buhatan sa kapolisan kagahapon sa buntag aron pasakaan og kaso.

Ang biktima kasamtangan gikustodiya sa Department of Social Welfare and Development samtang ang Women's Desk maoy nagdala sa biktima sa doktor aron ipahiling ang kinatawo niini nga ang resulta sa Pink Room misuporta sa pagpasaka'g kaso batok sa suspetsado.