Kolektor gitulis P20 mil nadala

Usa ka collector ang gitulis sa nagbinugtong tulisan ug pagkahuman gidala ang iyang motorsiklo dayong sirit palayo sa lugar.

Kini nahitabo sa miaging adlaw pasado alas 4 sa hapon sa Sitio Dungo-an Carcar.

Ang wala mailhing tulisan nilampos pagkuha sa koleksyon sa biktima nga mokabat sa P20,000.

Si Jonas Ali Saavedra ,21, collector sa Libcam Financing Corporation lumad nga taga M. Borgonia, Mabolo ning dakbayan personal nga mireport sa kapolisan human sa insidente.

Suma ni Saavedra nga samtang siya nangolekta sa naasoy'ng lugar kalit lang miabot ang gikatahapan ug dayong tion kaniya sa dala niining armas nga Uzi.

Wala makaugpo si Saavedra dihang nakalitan sa hitabo ug gikuha ang bag nga gisudlan sa salaping cash ug giapil pagdala ang motorsiklo nga Yamaha DT 125 YI-8307 ug nipasirit subay sa San Fernando, Cebu.

Si SPO1 Oscar Cantoy daling migukod sa tulisan apan napakyas sa pagsikop niini.

"Amo pa nang giimbestigahan kay wala gyud makaila ang biktima sa nitulis. Diri gani to ganiha nag- follow-up sa kaso" matud ni PO1 Loreto Rama nga nahinabi sa Banat News kagahapon.