Mga kandidato sa administrasyon maoy sponsors sa mass wedding

Mga nasyonal ug lokal nga kandidato ug inilang mga personalidad ang mga sponsors sa mass wedding sa kagamhanan sa dakbayan sa Sugbu nga ipahigayun karong adlawa samtang 62 ug 68 anyos nga magtiayon ang mangulo sa usa ka gatus ka paresan.

Nag-una niini sila si Kong. Juan Miguel Zubiri, Gob. Luis "Chavit" Singson ug Senador Francisco "Kiko" Pangilinan.

Apan matud pa ni Angela Calina sa AAA Promotions nga nakigtambayayong sa kagamhanan sa dakbayan sa Sugbu sa maong kalihukan nga sila si Singson ug Pangilinan ang mopadala ra sa ilang tagsatagsa ka representanti.

Kauban sa mga principal sponsors mao sila si Kong. Antonio Cuenco ug Kong. Raul del Mar ug tanang konsehal sa dakbayan sa Sugbu samtang may tagsatagsa usab ka papel sa kalihukan sila si Mayor Tomas Osmeña ug Bise-Mayor Michael Rama.

Ang maid of honor mao ang Miss Cebu 2007 nga si Loise Angelique Tan ug iyang first runner-up nga si Katrina Ros ug second runner-up nga si Ruby Guinto isip mga bride's maids.

Kini ang ikaduhang higayun nga himoon ang kalihukan pinaagi sa buhatan ni Konsehal Gerardo Carillo aron pagtabang nga mahimong legal ang panagpuyo sa mga magtiayun sa dakbayan sa Sugbu nga wala na'y hasol sa gasto.

Matud pa ni Carillo nga gawas sa gasto sa kagamhanan sa syudad, daghan usab ang mga donasyon nga ilang nadawat samtang nagtambayayong usab ang nagkalainlaing ahensiya sa lokal nga kagamhanan.

Ang mass wedding ipahigayun alas 12 sa udto karon sa Sto. Rosario Parish Church dayun iparada ang tanang kaslon padulong sa Cebu City Sports Center diin ipahigayun ang mass reception diin ang matag pares gitugutan nga makadapit og 50 ka bisita.

Ang kalihukan molungtad pa hangtud sa tungang gabii gumikan sa ka daghang kalingawan nga giandam lakip na sa kabataan ug apo sa mga kaslon karon sumala pa ni Calina.