Lalaking biyudo gipatay

Patay ang usa ka construction worker human kini pusila sa usa sa duha ka mga lalaking luwan og motorsiklo diha sa dalan A.Soriano sa barangay Mabolo kagahapon sa kaadlawon.

Ang namatay giilang si Jonathan Delima Cose,42, biyudo, usa ka construction worker sa maong lugar kinsa nakaangkon og usa ka samad pinusilan sa walang aping nga milapos sa tuong bahin sa liog.

Sumala pa sa duha ka mga kaubang kainom sa biktima duha ka mga lalaking luwan sa kolor pula nga motorsiklo ang mipusil kang Cose.

Sa imbestigasyon ni SPO3 Rey Cuyos sa Homicide Section ang biktima ug sila si Joel Bermundo,32, Dante Torremocha,30 nga pulos mga electrician sa usa ka gihimong edipisyo dinhi sa dakbayan nag-inom diha sa tindahan sa giilang si Rosita Icot nga dunay videokihan.

Miabot ang mga suspek ug diha mihunong duol sa gilingkuran sa tulo ug ang backrider nga nagsuot og puti nga t-shirt kalit nga mibunot og pistola ug mipusil sa biktima makausa ka higayon.

Ang tulo nagkatibulaag og dagan apan si Cose nahagba pipila ka metros gikan sa giimnan samtang ang mga suspek daling misutoy padulong sa direksyon sa pantalan.

Ang mga mirespondeng sila si PO2 Dindo Lumapak ug PO2 Edwin Maynela sa Mobile Patrol Group car 015 mao nay midala sa biktima sa Cebu City Medical Center apan gideklarar kining dead on arrival.

Nakuha sa grupo sa Scene of the Crime Operation pinanguluhan ni PO3 Ranolo Manolong ang usa ka basiyo sa bala sa kalibre .45.

Ang anak sa biktima mitug-an sa kapolisan nga wala siya makahibalo kung unsay rason sa pagpatay sa iyang amahan sanglit dili palang kini dugay nga miabot gikan sa kaulohan.

Si Inspector Mario Monilar hepe sa Homicide Section mitug-an sa Banat News nga ilang gisubay karon ang motibong may kalambigitan sa trabaho sa biktima ang kamatayon niini.