Matud pa ni Sonny nga ila lang gipasagdan ang paggamit ni Rico sa ilang bansagon sulod sa dugay na nga panahon.
Gani gihagit ni Sonny ang magtiayong Rico ug Mary Joyce sa pagpakita og kamatuoran sama sa marriage certificate sa ilang apohan.
Si Rico giingong anak ni Emilio Osmeña Jr., igsoon ni Sonny ug Lito.
Apan si Lito sa dihang gipangutana kabahin sa kandidatura ni Joyce igo lang niingon nga, "let's not talk about that poor woman" nga maoy nakapasuko kang Joyce.
Matud pa ni Joyce nga nakaminus ang iya untang uyoan ug nagpakita kini og plastik nga kinaiya.
Nunot niini gihagit ni Joyce si Lito nga moadto sa ilang lugar sa Lanao del Norte ug iyang himuon nga "boyax" ug "samohante" (sulogoon).
Sanglit mga edaran na sila si Lito ug Sonny, matud pa ni Joyce nga makigdungan siya sa duha sa pagsaka sa langit aron makita kon kinsay laparohon nila sa Ginoo gumikan sa pagsulti og bakak.
Matud pa ni Joyce nga kon dili pa sila Osmeña, gikiha na unta sila aron makapangita sila og laing apelyedo nga dad-on sama sa Gates ug Bolkiah.
"Sa kadaghang inilang apelyedo ning kalibutana, Osmeña gyud ang among dad-on?," nagkanayon si Joyce.
Dugang pa ni Joyce nga kon wala na angkona nilang Sonny ug Lito ang ilang amahan nga si Emilio Jr., posibling dili na usab nila angkonon ang laing igsoon nga si Teresita, asawa ni Antonio Oppus, kanhi general manager sa tugpahanan sa Mactan.