Patalinghug sa Lapu miduso nag COC

Nakaduso na sa iyang certificate of candidacy kagahapon sa buntag si Bise Mayor Norma Patalinghug alang sa pagsakbang kang Mayor Arturo Radaza kinsa magpasubli sa katungdanan isip mayor sa dakbayan sa Lapu-Lapu sa ikatulong termino.

Si Bise Mayor Patalinghug nga asawa ni kanhi Mayor Maximo Patalinghug maoy kandidato sa One Cebu ni Gobernador Gwendolyn Garcia ug maoy tandem niini si Konsehal Eugene Espedido.

Giduso ni Bise Mayor Patalinghug ang iyang COC sa Commission on Elections (Comelec) sa dakbayan sa Lapu-Lapu pinaagi sa ilang certificate of nomination sa Kampi ni Pangulong Gloria Macapagal Arroyo.

Dungan nilang miduso sa ilang COC ang line up nila sa konseho nga naglakip kanila ni Engineer Efren Herrera, Jonax Ygot, Reynaldo Berdin, Atty. Florentino Mata, Dr. Michael Ouano, Charl Baylosis, Booths Patalinjug, Norman Codilla ug

Pastor Cuenca.

Si 6th District Representative Nerissa Soon-Ruiz nga magpasubli sa ikatulong termino,Provincial Board Member Victor Maambong nga magpasubli usab sa ikatulong termino ug Konsehal Wenceslao Gakit misaksi niini.

Gikatakda ang opening salvo sa ilang pagpangampanya karong Sabado nga tambongan sa ilang mga dinapit nga naglakip kanila ni Kongresista Soon-Ruiz, Gobernador Gwendolyn Garcia ug Bise Gobernador Gregorio Sanchez nga magpasubli usab sa ilang ikaduhang termino.

Ang kampo ni Mayor Radaza kinsa magpasubli sa ikatulong termino pares ni Konsehal Mario Amores una na nga nakasang-at sa ilang COC niadtong milabay'ng adlaw.

Si Retired Police Officer Alejandro Barmego ang lakip na usab sa nakasang-at sa iyang COC kinsa kandidato nga independente alang sa pagka-mayor sa dakbayan sa Lapu-Lapu. - ug Bong Soriano