Alas 8:55 sa buntag nag-unang nisang-at sa ilang COC ang mga kandidato sa BOPK pinangulohan nila ni Mayor Tomas Osmeña ug Bise Mayor Michael Rama.
Apil sa niduso sa ilang kandidatura sila si Kongresista Raul del Mar sa north district ug Kongresista Antonio Cuenco sa South district apil na ang ilang bag-ong mga kandidato pagka-konsehal nga sila si Banilad barangay captain Leah Japson, Basak -Pardo barangay captain Roberto Cabarubbias ug pag-umangkon sa mayor nga si Ritchie Osmeña.
Si Japson maoy hulip ni konsehal Gabby Leyson nga molansar pagka-mayor sa siyudad sa Talisay samtang sila si Cabarrubias ug Ritchie maoy hulip nila ni Konsehal Procopio Fernandez ug Jocelyn Pesquera nga mapupos na ang termino.
Bugtong si Konsehal Rodrigo Abellanosa sa BOPK maoy wala makaduso sa iyang COC tungod kay matud pa atua pa kini sa gawas sa nasud ug sa pagkagabii pa moabot.
Samtang pagka alas 10:00 pasado sa buntag niabot sab ang pundok oposisyon nga gipangulohan ni Jonathan Guardo, kandidato pagka kongresista atbang ni Cuenco, Lahug barangay captain Mary-ann delos Santos ug Raymund Garcia nga maoy kandidato pagka-mayor ug bise mayor.
Apan bugtong si Guardo lang ang niduso sa iyang COC ug ang pito niya ka mga konsehal sa South district tungod kay matud niya ugmang adlawa pa moduso sa ilang COC sila si delos Santos ug Garcia apil na ang mga kandidato pagka konsehal sa Norte ug si kanhi NBI director Florencio Villarin nga maoy moatbang ni kongresista del Mar.
Human sa ilang pagduso sa kandidatura nidiretso ang mga kandidato sa BOPK sa White Gold ug ang oposisyon sa Royal Concourse aron mopahigayon og gamay'ng salo-salo kauban ang ilang mga supporters.