Gipresentar ni Mandaue City Police direktor, Sr. Supt. Alexander Abadinas ang duha nga nasikop mao si Ian Estopa, 30, ug Jupiter Sungahid, 30, ang duha residente sa JM Ceneza, Looc sa maong dakbayan.
Sila gisikop sa grupo ni Sr. Insp. Nicandro Seno, operation officer sa MCPO ug Insp. Marvin Lipas, human midangop kanila si Patricio Retesa, 48, usa ka negosyante nga taga Tawason ug gamit sa kapolisan ang P1,000 marked money.
Si Retesa nga nahinabi sa Banat News kagahapon nitug-an nga napikal siya ug nakahukom nga modangop nalang sa kapolisan tungod kay duha na ka tuig kapin wala pa gihapon molusot ang rehistro sa iyang motorsiklo.
Nisuway pa og hangyo si Estopa ngadto kang Retesa nga iyang humanon usa ka adlaw aron malusot ang rehistro apan wala panumbalinga ang hangyo sa naulahi.
Matud ni Retesa ang una niyang gikasabot nga fixer mao si Pedro Alosada alyas Barry apan wala maapil kagahapon sa entrapment kay naatol nga wala diha.
Mokabat sa P1,829.00 ang kinatibuk-ang nahatag niya kang Estopa ug kang Alosada gawas lang ni Sungahid kay igo lang kining suguon sa duha pag follow-up diha sa LTO.
Si Sr. Supt. Abadinas nagtuong dili ra si Retesa ang nabiktima niining mga suspek ug iyang giawhag ang katawhan nga nabiktima nga mopakita sa iyang buhatan aron idugang ang ilang reklamo ingon man madugangan og laing atubangon nga kaso.