Lalaki ‘nagpusil’ sa ulo, nahagbong sa rooftop

Namatay sulod sa pribadong tambalanan ang usa ka 27 anyos nga lalaki human kini gituohang nagpusil sa iyang kaugalingon sa miaging gabii pasado alas 10 diha sa Sitio Guillermo, Hipodromo ning dakbayan.

Samdan sa tuong tampihak agi sa bala sa kalibre .45 nga maoy gituohang gigamit ni Jeffrey Yu, minyo, ug residente sa nahisgutang dapit pagkutlo sa iyang kinabuhi.

Si Joseph Yu, 16 anyos, half brother sa namatay nga nahinabi sa sibyaanang DYDD nitug-an nga sa wala pa mahitabo nga naghikog ang iyang igsuon duna kini gikaistorya sa cellphone samtang nagtupad silang duha og lingkod.

Nagtuo siyang usa ka babaye ang kaestorya sa iyang igsuon ug dako ang iyang pagduda nga mao kini nakaingon nga naghikog.

Dugang pa ni Joseph nga iyang nakit-an nagdala og armas si Jeffrey dayong saka sa rooftop sa ilang balay.

Pagka-taudtaud nakadungog sila’g usa ka lanog nga buto gikan sa taas ug sa dihang gisusi sa mga kabanay diha na sa second floor nila makit-i ang biktima ug gituohan kining nahagbong gikan sa rooftop sa balay.

Daling gidala si Yu sa Chong Hua hospital apan usa ka oras kapin ang nakalabay nakabsan kini sa kinabuhi.

Ang Homicide Section sa Cebu City Police Office nagpadayon pa sa ilang imbestigasyon sa maong kaso.

Usa ka kalibre .45 pistola nga may unom ka buhing bala ug usa ka basiyo sa kalibre. 45 ang napalgan diha sa crime scene.