Ang biktima mao si Melanio Patalinjug Valiente, 30, nagpuyo sa maong dapit kinsa nabulit og samad dinunggaban ang kalawasan ug wala nay kinabuhi diha ra usab sa ilang barangay.
Sa imbestigasyon ni SPO2 Rolito Jumao-as sa homicide section nasayran nga usa ka bata nga nagduwa og tabanog ang nakakita sa biktima nga wala nay kinabuhi.
Atol sa pagresponde sa kapolisan gahi na ang maong patay’ng lawas nga gibinaklid og gapos ang kamotug dunay pito ka samad dinunggaban sa kalawasan ug gituohan nga kauban ra usab niini ang mihimo sa maong krimen.
Gisusi karon ni SPO2 Jumao-as ang koneksyon sa nahitabong pagtulis ug pagpatay nga nahitabo sa lotto attendant ug sa tricycle driver sa milabay’ng gabii.
Mikumpirmar usab ang amahan ni Valiente nga si Ignacio Valiente nga nalambigit sa mga tulis, kawat ug illegal nga drogas ang iyang anak .
Gumikan niini si LapuLapu Police Chief, P/Supt. Louie Oppus mimando na sa iyang mga sakop sa daling kasulbaran sa maong kaso ug subsob nga imbestigasyon sa sunod-sunod nga kasong pagpanulis sa ilang area of responsibility diin ang mga biktima gipamatay na sa mga tulisan.