Matud pa ni Lapu-Lapu City Police Chief, Sr. Supt. Louie Oppus ang maong bomba usa ka "incediary bomb" nga kasagarang gigamit sa Ikaduhang Gubat sa kalibutan ug panahon sa Vietnam War.
Ang maong matang sa bomba sumala pang Oppus mosunog sa bisan unsang butang sa palibot niini kung kini mobuto sanglit usa kini ka anti-personnel bomb.
Sa imbestigasyon sa Special Weapons and Tactics sa kapolisan sa Lapu-Lapu usa ka Jessie Gonzaga nga tag-iya og junkshop sa maong lugar ang nakapalit niini gikan sa wala mailhing mamunitay og basura duha na ka adlaw ang nakalabay.
Apan kagahapon pa ni Gonzaga iyang gipagawas ang maong bomba apan namatikdan nga dunay migawas nga aso gikan sa maong bomba hinungdan nga gidali nila kini og labay sulod sa atabay diha sa ilang tugkaran.
Dali usab nilang gitawgan ang kapolisan kabahin sa nahitabo ug ang mga sakop sa SWAT bomb disposal unit maoy miresponde sa maong dapit ug maoy mikuha sa bomba ilawom sa atabay.
Ang maong bomba gidala sa SWAT ngadto sa Sitio Toril, sa barangay Canjulao aron didto kini pabuthon.
Human mapreparar ang pagpabuto niini mipalayo ang mga sakop sa SWAT ug pagka alas 10:40 a.m. mibuto kini ug mimugna og 300 - 400 metros ang gilapdon sa gitay-og niining yuta uban sa pag-ulbo sa baga kaayong aso niini.
Gisiguro sa SWAT nga di makamugna og sunog ang maong bomba hinungdan nga aso ray migawas niini.Gisusi pa hinuon sa kapolisan kung unsay hinungdan sa pag-aso niini diha sa junkshop.
Gumikan niini, si Oppus mopatawag og tigum sa tanang mga tag-iya og junkshop aron kahatagan og seminar kalabot sa nagkalain-laing klase sa bomba nga posibleng ibaligya sa ilang shop.-Bong Soriano