Yapha vs. Gwen sa Mayo

Hayan si Kongresista Antonio Yapha sa ikatulong distrito sa lalawigan sa Sugbu ang ikasangka ni Gobernador Gwendolyn Garcia sa bugnong lugaynon karong Mayo 14.

Kini ang resulta sa mga sabotsabot nga gihimo sa mga liderato sa Lakas-Christian Muslim Democrats Lakas-CMD sa panimalay ni kanhi Gobernador Emilio Lito Osmeña niadtong Lunes sa gabii.

Si Yapha kinsa daan nang nanaad nga dili na mobalik sa natad sa pamolitika nagkanayon nga dili na siya makaikyas kon ang kadagkoan sa partido maoy motuboy kaniya.

Apan bisan kon wala pay opisyal nga deklarasyon ang pamunoan sa partido Lakas, gitataw na ni Yapha nga si kanghi Kongresista Celestino Martinez Jr. dili mokandidato pagkagobernador kay gusto kining mosubo sa pagkamayor sa Bogo City, samtang si Kongresista Clavel Martinez mopahuway una kay ang mokandidato pagka-kongresista sa ikaupat nga distrito mao man ang iyang anak nga si Mayor Celestino "Tining" Martinez sa Bogo.

Si Yapha nagkanayon nga wala nay nahunahunaan ang kadagkoan sa partido nga mahimong iatbang batok kang Gobernador Garcia busa "kon ako gyuy itudlo, andam na akong mangampanya alang sa akong kandidatura, matud pa ni Yapha.

Gitataw usab niya nga si Provincial Board member Estrella Yapha maoy mokandidato pagka-kongresista sa ikatulong distrito, samtang ang iyang anak nga si Geraldine Yapha, maoy mokandidato pagka-mayor sa Lungsod sa Pinamungajan.

Si Yapha miingon nga ang final nga sabotsabot sa partido gitakda nga himuon sa Martes sa gabii diin klarohon kun mahinayon ba gyud nga si Kongresista Clavel Martinez maoy mahimong tandem niya.