O Kintanar nipadayag nga andam mopasakop sa kampo ni Gwen Garcia

Andam si Atty. Oliveros Kintanar nga modawat kun adapon sa partidong Kampi-One Cebu Party alang sa pagka bokal sa ikaduhang distrito sa lalawigan sa Sugbu karong eleksyon sa Mayo.

Si Kintanar miingon nga niadto pang Pebrero ning tuiga siya miduso sa sertipiko de kandidatura nipadayag na siyang daan nga bisan paman kun independente ang iyang pagdagan modawat gihapon siya kun dad-on sa gobernador.

Matud pa ni Kintanar nga bisan paman kun independente ang iyang pagsalmot karong eleksyon si Gobernador Gwendolyn Garcia gihapon ang iyang paluyuhan samtang si kanhi gobernador Pabling Garcia maoy iyang paluyuhan sa pagka-kongresista.

Hinuon iyang gipadayag nga iya lang unang paabuton kun kuhaon siya sa partidong Kampi-One Cebu gumikan kay hangtud karon wa man usab kini makabutang kun si kinsa ang ilang padaganon isip mga sakop sa provincial board ug gani siya paman usa diha sa ilang distrito ang nakaduso sa kandidatura.

Iyang giklaro nga nagsugod na siyag suroy-suroy sa mga hilit nga lugar diha sa ikaduhang distrito sukad siya miduso sa iyang sertipiko.