Piskal gireklamo sa money transper

Usa ka piskal sa Regional Trial Court ang gireklamong namatid og pultahan ug mipasangil sa usa ka money transfer nga mikawat sa kwartang gipadala kaniya diha sa may Fuente Osmeña sa Capitol Site ning dakbayan kagahapon sa buntag.

Usa ka Gene Rose Magalso, 22, taga dalan Escario sa Capitol Site ug kahera sa Petnet Western Union sa nahisgutang lugar ang midangop sa kapolisan sa Fuente Osmeña.

Ang gireklamo mao si regional prosecutor Vicente Mañalac kinsa mianha sa Petnet Western Union aron sa pagkuha sa gipadalang kwarta kaniya.

Giingong gipangitaan ni Magalso og valid identification card si Mañalac ug kini mipresentar og ID nga nagpailang siya sakop sa Regional Prosecutor’s Office sa Palace of Justice.

Apan sa pagsusi ni Magalso sa ID niini, namatikdang dili parehas ang spelling sa pangalan niini sa tawong gipadalhan dinhi sa Sugbu maong gitambagan siyang patawgan ang nagpadala kaniya nga ipausab ug klaruhon ang spelling sa pangalan.

Ang pangalan sa gipadalhan "Vincent Mañalac" samtang ang pangalan sa ID sa piskal Vicente Mañalac apan giingong namugos ang piskal ug namatid sa pultahan dihang giingnan nga patawgan og balik ang tawong nagpadala aron ipausab ang spelling sa pangalan.

Si Mañalac sa pakighinabi sa Banat News nagkanayon nga siya maoy reklamante niadtong tungura tungod kay ang iyang kwarta wala i-release bisan paman sa pagpakita niya sa tukmang ‘code number ug’ pangalan sa nagpadala.

Matud pa niya mihangyo pa siyang mo-execute og affidavit, ipa-record sa police blotter ang pag-release sa kwarta nga siya’y midawat, lakip na kopya sa xerox ID niya ug uban pang kamatuuran.

Apan giingong wala gihapon mosugot si Magalso hinungdan nga miadto siya sa police station aron magpatabang apan nagmagahi gihapon si Magalso hinungdan nga buot ni Mañalac nga kini arestuhon tungod kay giisip niyang ang gibuhat ni Magalso krimen nga pagpangawat sa iyang atubangan.

"I have expressed my intention that I will conduct a warrantless arrest because a crime has been committed in my presence, so I called the police… ang spelling wrong pero ang tag-iya dili, pareho ra gihapon,…when you assert your right, you are not vexing. I am the one who is vexed not them, " asoy pang Mañalac kabahin sa iyang mga pamahayag atol sa pakighinabi.

Matud pang Mañalac nga wala siya mopa-blotter sa kapolisan tungod sa kadaghan sa iyang gimbuhaton apan nagtuo siyang nahadlok ang kahera nga iyang ikiha tungod kay iya kining gipangayoan sa pangalan maong nag-una kini og pa-blotter sa kapolisan.