Utok migawas

Nalata ang nawong ug migawas ang utok sa usa ka hamtong lalaki human gidakdakan og pinutol nga lubi sa iyang gikasumbagay nga miresulta sa pagkamatay dihadiha.

Nahitabo kini pasado alas 2 sa miaging adlaw sa Apo, Argao mga 12 ka kilometro ang gilay-on gikan sa Poblacion.

Ang biktima giila sa kapolisan nga si Primo Gemarino, lumad nga taga Ronda, Sugbu ug temporaryong nagpuyo sa nahisgutang lugar dihang may gikapuyo nga taga Apo.

Ang gitumbok nga suspek kinsa misibat human sa insidente giila nga si Carlos Vilamor, lumad nga taga Marigondon LapuLapu City ug kasamtangan nagpuyo sa Cantularoy, Argao.

Si PO1 Rodrigo Teo sa Argao Police Station nga nahinabi sa Banat News niingon nga sa wala pa mahitabo ang insidente ang suspek nananghid sa asawa sanglit may gikasabot nga moadto sa sapa aron magpahubas og pantat.

Apan nasayran nga mitambong diay og birthday party sa bayaw sa biktima nga si Romeo Mansanades ug didto ang biktima ug ang suspek nagkaabot ug nag-inom.

Sa ilang pagpamauli nagkuyog ang duha nga pulos na nakainom apan kalit lang nagkalalis sa wala matinong hinungdan nga misangko sa pagsinukmagay.

"Pagkatumba gidakdakan, gipukpok sa nawong sus grabe nalata ang nawong ug migawas ang utok" matud ni PO1 Teo.