Kuhaan og ayuda ang City BFP kun...

Giprangkahan ni Mayor Tomas Osmeña ang bag-ong gitudlo nga Regional Director Bureau of Fire Protection (BFP-7) Sr. Supt. Elioterio Iturriaga nga dili siya mosugot nga dunay mga kausaban nga ipatuman niini sa kabomberohan dinhi sa dakbayan nga walay pagtugot ug konsultasyon gikan kaniya.

Giluwatan kining maong pasidaan sa mayor atol sa gihimong pagpakigtagbo ni Sr. Supt. Iturriaga kang Osmeña kagahapon sa buntag.

Partikular nga gitumbok sa mayor sa mao niyang pamahayag mao si Supt. Esmael Codilla nga dugay nang gitinguha sa ulohang buhatan sa BFP nga hulipan sa iyang pagka-City fire marshal tungod kay over qualified na kini sa maong posisyon.

Nasayran nga ang magsilbing city fire marshal sa usa ka siyudad nagkinahanglan lang og nagranggo og Chief/Insp. apan si Codilla Supt. na ang ranggo hinungdan nga over qualified na kini sa posisyon.

Una nang nibahad si Osmeña nga kansilahon ang tanang mga ayuda sa siyudad ngadto sa fire department kon ipamugos niini ang pagparelibo kang Codilla nga gihulagway sa mayor nga epektibo sa iyang katungdanan.

Samtang gipadayag ni Iturriaga dihang nahinabi sa mga tigbalita nga nihimo siya og kortesiya sa mayor aron mahibaw-an niini ang mga palisiya nga gisagop sa dakbayan.

Matud niya walay pormal nga kamanduan nga gihatag ang mayor gawas lang sa gidemanda niini nga gikinahanglan nga mopakita sila sa ilang performance nga mao ang ka-abtik pagtubag sa mga motumaw nga alarma sa sunog.

Gipasalig sab ni Osmeña nga andam siya nga ang siyudad maoy temporaryong mo-abaga sa galastohan sa gasolina sa mga fire trucks dinhi sa dakbayan samtang wala pa masulbad ni Codilla ang iyang unliquidated cash advance nga maoy basihan pag-release og gahin sa gasolina gikan sa ulohang buhatan sa BFP.