Duha patay sa aksidente

Duha ka tawo ang namatay sa managlahing aksidente sa kadalanan, usa kanila 59 anyos nga gisungag sa usa ka six-wheeler truck samtang siya mitabok sa karsada sa Yati, Liloan niadtong Sabado.

Sa unang insidente, si Delfin Cabahug, 59, nga residente sa maong dapit nadasmagan sa trak nga gipanag-iya sa Arkane International ug gimaneho ni Richard Niadas, 44, taga Tayud Liloan.

Sumala pa ni PO2 Rutchel Jugalbot sa pakighinabi sa mga tigbalita, wala makabantay ang biktima sa pagtabok niini sa dalan sanglit niadtong tungura ngitngit pa ug tungod sa pangidaron usab sa biktima.

Ang maong trak gikatahong nagsunod sa usa ka PUJ niadtong tungora nga sa kalit lang nadasmagan ang biktima. Gisuwayan ni Niadas ug likay ang sakyanan apan naigo gyud sa suga sa atubangan sa trak si Cabahug.

Daling gidala si Cabahug sa Eversly Hospital sa dakbayan sa Mandaue apan gideklarar kining dead on arrival. Samtang si Niadas mitahan sa iyang kaugalingon sa Consolacion police station.

Si Niadas gibuhian sa kapolisan human magkasabot sa kabanay sa namatay nga bayran ang danyos ug paghipos sa patay'ng lawas niini.

Samtang sa laing bahin pagkahapon sa samang adlaw, laing aksidente ang nahitabo diha sa West Binabag sa Tayud Consolacion diin usa ka traysikol nga gimaneho ni Hercel Pepito ang nakadasmag kang Arley Bataluna, 38, taga sitio Kawayan,Yati Liloan.

Si Pepito gikan pa sa sitio Tawagan ug padulong sa Bagong Daan sa Yati, Liloan dihang pag-abot sa gihitaboan nadasmagan niini si Bataluna nga nagmaneho sa iyang mountain bike.

Sumala pang SPO1 Romulo Sasing sa mga tigbalita, wala magkasabot ang duha sa traffic signal. Si Bataluna gikan pa sa iyang igsuon nga si Ariel ug pareho usab og direksyon nga padulngan ni Pepito.

Niadtong tungora si Bataluna mihunong sa eskina sa pagtuong si Pepito mouna og labang, samtang si Pepito mipaaginod usab sa pagpadagan tungod sa pagtuong molabang og una si Bataluna.

Apan ning tungora dunay misenyas kang Pepito nga moabante hinungdan nga midiretso kini samtang si Bataluna usab midiretso usab hinungdan nga silang duha nagsungagay.

Si Bataluna daling gidala ni Pepito sa Vicente Sotto Memorial Medical Center uban ang igsuon ni Bataluna apan dangtan og pila ka oras nakabsan kini sa kinabuhi.

Si Pepito gidakop sa kapolisan diha sa iyang panimalay pagkatungang gabii diha sa sitio Bajabaja, Tayud, Consolacion alang sa pagpasaka og kaso.