Binghay wala matandog sa pagsaway ni Yapha

Dili isyu alang kang Balamban Mayor Alex Binghay ang pagsaway nga giluwatan ni Kongresista Antonio Yapha nga imposibleng mahimong siyudad ang maong lungsod tungod kay bangkarota ang panudlanan niini.

Una niini, si Yapha misaway sa pamahayag ni Atty.Pablo John Garcia nga himuon niining siyudad ang Balamban pinaagi sa usa ka balaudnon kung siya mapiling Kongresista sa Ikatulong Distrito.

Nagkanayon si Yapha nga dili makapasar ang Balamban sa mga rekisitos diha palang sa panudlanan niini, apan si Binghay nga gihinabi sa Banat News nagkanayon nga karaang dokumento ang gihuptan ni Yapha may labot sa kahimtang sa panudlanan sa iyang lungsod.

Base sa nakuhang kopya sa Banat News gikan ni Yapha nga iyang nakuha sa Bureau of Local Government Finance sa Department of Finance sa kaulohan mokabat lang sa P22 kapin ka milyon ang na-remit sa lungsod niadtong tuig 2004-2005 isip maoy average annual regular income niini.

Matud pa ni Mayor Binghay nga para kaniya dili kini usa ka isyu ug gawas pa iyang gipaniguro nga karaang dokumento ang nahuptan ni Yapha ug dili ang bag-ong balaudnon nga nakalatid ang bag-ong proseso sa paghimo nga usa ka dakbayan sa usa ka lungsod.

Sa pagkakaron dili pa kumbinsido si Binghay nga mahimong siyudad ang Balamban kung dili makatabang sa kahimtang sa iyang mga konstituwente susama sa mga gideklarar nga mga bag-ong siyudad nga wala makapaalibyo sa mga kabus nga residente.

Matud pa niya di niya igsapayan kung di mahimong siyudad ang Balamban sanglit kasamtangan karong niani ang katawhan sa abot gikan sa mga dagkong kumpaniyang naa karon magbase sa ilang lungsod.