Pundo sa city disaster tibuok pa

Intact pa ang usa ka gatos ka milyon ka pesos nga pundo nga gigahin sa Cebu City Disaster Coordinating Council (CCDCC) alang sa mga gastuhan sa bisan unsang kalamidad nga masugatan sa dakbayan sa Sugbu karong tuiga.

Si Konsehal Gerardo Carillo kinsa maoy tsirman sa CCDC miingon nga ubos palang sa diyes porsento ang ilang nakuha sa maong pundo gikan sa calamity fund nga gigahin sa dakbayan sa maong buhatan.

Gipasalig ni Carillo sa mga taga dakbayan sa Sugbu nga ang ilang buhatan andam sa kanunay sa pag-assist kun adunay mga panginahanglan kun simbako adunay mga kalamidad sama sa sunog ug uban pang mga dili matag-an nga panghitabo.

Dugang pa niini nga ang CCDCC makapagawas dayon og pundo og hinabang ngadto sa usa ka gatos ka mga pamilya kun gikinahanglan.

Kini tungod kay aduna na silay gipundo daang mga pagkaon, bugas nga nilata ug uban pang mga panginahanglan kun adunay mga kalamidad.