Chavit Singson Movement gilusad

Usa ka gamay nga seremonyas ang gihimo diha sa Parklane Hotel diin gilusad ang Chavit Youth and Peoples Movement nga gipaluyohan sa kampo ni kanhi Gobernador Chavit Singson kagahapon sa hapon.

Ang seremonyas gitambongan sa pipila ka miyembro sa Timpuyog Daguti Ilocano (TI Cebu Foundation Inc.) pinanguluhan ni Ben D. Duque, presidente sa maong kahugpungan.

Si Geremy Singson Goular ang manghod ni Chavit nga mitambong sa maong paglusad mihatag sa iyang inspirational talk ngadto sa mitambong niini.

Gani nanghinaut kini siya nga botaran niini ang iyang maguwang karong umaabot piniliay tungod kay matud pa niini sinsero ug naay baruganan ang iyang igsoon.

Si Ben Duque nga gikahinabi sa Banat News miingon nga ang paghatag nila og suporta sa kanhi Gobernador sa Ilocos dili tungod kay nanghinaut kini nga matabangan ang ilang grupo kon dili dako ang ilang paglaum nga matabangan niini ang katawhan ilabi na gyud dinhi sa siyudad sa Sugbu.

Midugang si Duque nga ang iyang grupo naglaraw nga mabag-o ang sistema dinhi sa Pilipinas ug gani matud pa wala sila maglaum nga tabangan pa kini sila mahitungod sa "monetary" tungod kay sila tanan mga miyembro sa kahugpungan professional man.

Samtang sa laing bahin ang grupo ni Chavit Singson nagmalaumon nga ma implementar niini ang 15% share of excise taxes nga nalatid sa R.A 7171 alang sa probinsya sa Ilocos Sur nga mao ang sentro sa tobacco.

Ug mao kini karon ang usa sa mga laraw ni Chavit Singson kon ugaling mapili kini isip senador karong umaabot piniliay.