Daan wala i-junk ni Rep. Gullas sa Kampi

Gi-junk sa kampo ni Kong. Eduardo Gullas sa unang distrito si kanhi Bokal Julian "Teban" Daan sa iyang tinguha nga modagan pagbalik sa pagka-sakop sa Hunta Probinsiyal.

Nisang-at na sa iyang certificate of candidacy sa pagka-sakop sa Hunta Probinsiyal kagahapon ang negosyante nga si Walter "Boy" Selma, igsoon ni Minglanilla Mayor Eduardo Selma.

Si Selma dunay nominasyon gikan sa Kabalikat ng Malayang Pilipino (Kampi) nga gilagdaan sa district chairman nga si Gullas.

Si Selma ang ikapares ni Bokal Juan Bolo kinsa unya pa sunod semana mosang-at sa iyang COC.

Samtang si Daan nipadayag nga mopadayon siya sa iyang tinguha isip usa ka independente ug dili na siya makigkita ug makig-estorya kang Gullas.

Nagtoo si Daan nga panimawos ang gihimo ni Gullas ngadto kaniya sa dihang kalit siyang nibiya sa grupo niadtong tuig 2004 ug nidagan sa pagkabise-gobernador kauban ni Gwendolyn Garcia.

Samtang giklaro ni Gullas nga wala niya gi-junk si Daan sanglit wala pa siyay giproklamar nga kandidato sa pagkasakop sa hunta probinsiyal.

Gipasabot ni Gullas nga nihangyo kaniya ang grupo ni Talisay City Mayor Socrates Fernandez nga padaganon si Daan pagka-konsehal.

Matud pa ni Gullas nga kon unsay mga benepisyo ni Daan nga makuha sa Kapitolyo, sama ra usab ang iyang makuha sa dakbayan sa Talisay.

Giklaro ni Gullas nga kon pag-junk ang hisgutan, si Daan ang nihimo niini niadtong 2004 apan dugay na niya kining napasaylo.