Kusinero sa IBP-Cebu Canteen gipusil patay

Kusinero sa kantina sa Integrated Bar of the Philippines gipusil patay diha sa dalan Caimito sa barangay Basak-San Nicolas kagahapon sa kaadlawon.

Patay na ug wala nay kinabuhi nga napalgan ang biktimang si Glenn Gantuanco,40, ulitawo ug residente sa maong lugar ug may samad pinusilan sa iyang kalawasan ug ulo.

Usa ka Reynaldo Años alyas Tiboy, silingan sa biktima ang gitumbok nga mipatay sa biktima tungod sa selos nga dunay relasyon ang biktima ug ang iyang kapuyo nga giilang si Gina Granada.

Matud pang PO3 Rogelio Nedamo sa Homicide Section ang biktima kasamtangang naglakaw sa maong lugar dihang kalit nga giduol sa suspek ug walay daghang pangutana gipaulanan kini og bala makadaghang higayon.

Ang biktima naigo diha sa iyang ulo, walang abaga, walang bahin sa dughan ug tiyan nga maoy hinungdan sa hinanali niining kamatayon.

Human sa pagpamusil gikatahong nakit-an ang suspek ug iyang pamilya nga nanghipos sa ilang mga gamit ug milayas sa ilang panimalay.

Nagtuo karon ang kapolisan nga posibleng ang pangabubho sa suspek ngadto sa biktima ug iyang kapuyo maoy hinungdan sa pagpatay.