Gungob nibiya na sa One Cebu ni Gwen

Hingpit na nga mibiya sa iyang pagpasakop sa One Cebu Party ni Gobernador Gwendolyn Garcia si Mayor Avelino Gungob sa lungsod sa Consolacion sanglit mibalik kini sa Lakas-CMD nga maoy orihinal niyang partido.

Kini maoy nahimong linugdangan sa pagdumili ni Gungob nga si Bise Mayor Leo Go nga maoy ika-tandem sa Mayo 14 nga piniliay sanglit si Konsehal Ember Alinsug man ang gipili niini.

Si Gungob mideklarar sa iyang pagpaluyo sa kandidatura ni Bokal Gabriel Luis "Luigi" Quisumbing ang nakahukom sa paghingpit sa iyang pagbiya sa kampo ni Garcia human sa panagtagbo nga ilang gihimo sa miaging adlaw.

Matud pa ni Gungob nga kuyog niya nga ang iyang line up sa konseho sa pagpakigtagbo kang Garcia isip pagsanong sa pagdapit kaniya ni Mayor Thadeo Ouano.

Giklaro niya nga nahingpit ang iyang pagbiya sa One Cebu Party ni Garcia ug sa Kabalikat ng Mamamayang Pilipino (Kampi) dihang gideklarar sa gobernador ang pagpalagpot kaniya sa pundok niini.

Si Gungob miingon nga gikahisagmuyo sa gobernador ang iyang pagsuporta sa kandidatura ni Quisumbing nga mosakbang kang Kongresista Nerissa Soon-Ruiz sa Mayo 14 nga eleksiyon.

Matud pa ni Gungob nga ang pagtangtang kaniya isip chairman sa One Cebu Party mao usab ang naghingpit sa iyang pagtakli sa iyang suporta sa mga mokandidato nga gobernador nga mosakbang niini.