Dean sa Law nominado sa Akapin

Sugbuanon ang usa sa tulo ka nominado sa partylist sa sektor sa mga tawo nga dunay kakulian sa panglawas (persons with disabilities) nga gitawag og Alyansa ng may Kapansanang Pinoy (Akapin).

Siya mao si Atty. Jonathan Capanas, taga dakbayan sa Sugbu ug kanhi opisyal sa Bureau of Internal Revenue sa Sugbu ug karon Dean sa College of Law sa University of San Jose-Recoletos.

Gawas nga abogado, usa pa gyud siya ka Certified Public Accountant ug lisensiyadong real estate broker.

Lahi sa duha ka nominado, si Capanas dili disabled apan duna siya’y anak nga dili maayo ang panan-aw (visually-impaired).

Ang laing nominado mao sila si retired Navy Captain Oscar Taleon, pangulo sa Akapin Partylist nga taga Marikina City kinsa usa ka visually-impaired ug si Dr. Teofilo dela Cruz Jr., usa ka orthopedically-handicapped nga taga Kabacan, North Cotabato ug vice-president for South-Central Mindanao sa Akapin.

Sa samang higayun, si Capanas mao ang legal consultant sa Akapin Partylist.

Tumong sa Akapin Partylist sa pag-angkon og lingkuranan sa Ubos-bay Balauranan mao ang pagdala sa tingug sa otso milyones ka disabled nga mga Pinoy aron may patas nga kahigayunan sa edukasyon, panarbaho ug uban pang kahigayunan sa pagpaarang-arang sa ilang kinabuhi.