Tomas nagbantay sa lihok ni Gwen

Gipadayag ni Mayor Tomas Osmeña nga dili niya pugngan og babagan ang kagamhanan sa probinsya sa Sugbu kun gusto kining magtukod og bisan unsang mga proyekto ug edipisyo sa mga luna niining gipanag-iya nga nahimutang dinhi sa siyudad sa Sugbu.

Apan giklaro usab ni Osmeña nga dili siya mopugong o mobabag kon ibaligya o ba kaha tukoran og mga edipisyo sa Kapitolyo ang mga luna niining gipanag-iya apan dili usab siya makapasalig sa seguridad niini.

Mao kini reaksiyon sa mayor kabahin sa giluwatang pamahayag ni Gobernador Gwendolyn Garcia atol sa milabay’ng pagpamulong niini sa pundok sa mga magpapatigayun nga mipahibalo sa mga luna sa Kapitolyo nga nahimutang dinhi sa dakbayan nga plano nilang ibaligya.

Hinuon gipadayag ni Osmeña nga kun gusto gyud nga magmugna og mga edipisyo ang Kapitolyo alang sa proyekto niining gitinguha gisugyot niya ang South Reclamation Project (SRP) nga maoy haum nga lugar alang sa maong katuyoan.

Gitug-an usab ni Osmeña nga wala na karon silay komunikasyon tali ni Garcia may labot sa nagubot nga land swap deal apan gitug-an sa mayor nga kanunay niyang gibantayan ang mga lihok sa gobernador nga himuon dinhi sa dakbayan human kini mibahad nga bantayan ang iyang mga lakang nga himuon.

Mitumaw ang panagsungi nila ni Garcia ug Osmeña human wala aprobahi sa Kapitolyo ang giduso sa siyudad nga orihinal nga bersyon sa land swapping aron masalbar sa demolisyon ang kapin 5,000 ka pamilya nga nagpuyo karon sa luna sa Kapitolyo dinhi sa dakbayan ug mibawos usab ang siyudad pinaagi sa pagpatuman og moratorium sa bisan unsang konstruksyon sa Ciudad project sa probinsya diha sa Banilad Area.