Ang pormal nga paglusad gihimo diha sa 19th Floor sa Club Ultima sa Osmeña Blvd. pinanguluhan sa mga opisyales sa Kapisanan ng mga Brodkaster ng Pilipinas, chairman Edward Abad ug KBP-Vice President Leo Lastimosa ug uban pang inilang mga broadkaster sa Sugbu.
Si Abad nagkanayon nga niining paagiha makatampo ang hugpong sa KBP pinaagi sa ilang 39 ka mga AM ug FM radio station nga sakop sa KBP-Cebu Chapter sa pag-edukar ug pagpalapad sa kampanya mahitungod sa inutok nga pagboto.
Nanghinaut si Abad nga mahinumdoman sa kabataan ug mosunod nga henerasyon nga dunay dakong papel nga gitampo ang KBP sa eleksyon ning tuiga aron mapahibalo ang katawhan sa unsa ug kinsay angayang botohan.
"The plug is aimed to educate and guide our electorate in choosing candidates for the upcoming May 14 elections," nagkanayun si Edward Abad, pangulo sa KBP sa Sugbu.
Matud pa ni Abad nga sugod sa Biyernes, gikauyunan sa mga sakop sa KBP sa Sugbu nga mopabati sa maong 30 segundos nga plug dili mominus kaupat sa usa ka adlaw hangtud sa adlaw sa eleksiyon.
Iyang giklaro nga dili pagpangampanya og kandidato ang ilang tumong kon dili paghatag sa giya sa mga botante sa pagbotar sa mga kandidato nga maoy modala sa maayong ugma sa kabataan karon.
Ang KBP Cebu ninggamit sa mga lokal ra usab nga tingug sa mga talento nga nihimo sa mga pluggings ug pareho kining ipadungog sa kahanginan.
Si Lastimosa sa iyang bahin nagkanayon nga bisan gamay ra kaayo kining kalihukan sa KBP ila kining isipon nga tampo sa paningkamot nga makatabang sa kausaban ug mitug-an nga usa kini sa mga social obligations sa KBP ngadto sa katawhan ug ingon man pamasin nga maka-edukar usab sa mga kandidatong buot mopapili karong eleksyon.
Ang maong mga "pluggings" dunay tulo ka bersyon nga Binisaya ug pinulungang Ingles aron gamiton sa AM ug sa FM stations.