Lote sa San Roque ipa-relocate

Kagamhanan sa dakbayan sa Talisay mopa-relocate sa duha ka lote diha sa Barangay San Roque para mapiho kung nasulod ba sa maong lote ang 36 ka residente diin naagian usab kini sa Cebu South Coastal Road.

Si Bise Mayor Aberdovey Belleza mibutyag kagahapon sa Banat News nga ang lote numero 8035 nga dunay gilapdong 2,133 metro kwadrado ug ang lote numero 2192 nga dunay gilapdong 2,953 metro kwadrado gipanag-iya nila ni Alfredo ug Carlos Ngosiok.

Ang duha ka lote gikatahong giukopahan karon sa 36 ka pamilya diin sobra sa 30 ka tuig na silang mipuyo niini.

Apan usa ka buwan ang milabay gipadalhan ang maong mga residente og notisya nga papahawaon gikan sa ilang gipuy-an tungod kay dili sila maoy tag-iya sa lote.

Matud ni Belleza nga miduol sa iyang buhatan ang maong mga residente ug nangayo og panabang hinungdan nga ang kagamhanan sa siyudad mihatag og legal assistance.

Ang mga residente usab sa lugar mihimakak nga nasulod sila sa lote sa pamilyang Ngosiok hinungdan nga ipa-relocate kini sa kagamhanan sa siyudad.

Karong adlawa gikatakda ang preliminary hearing tali sa mga residente sa lugar ug sa pamilyang Ngosiok kabahin sa nahisgutang problema.