Ediegul mihimakak sa pasangil

Si Kongresista Eduardo Gullas mihimakak sa pasangil batok kaniya nga siya maoy midasig sa Philippine Drug Enforcement Agency (PDEA) nga pasakaan og kaso si kanhi Bise Gobernador John Gregory "John-John" Osmeña.

Ang Kongresista igo lang mipahiyom ug nagpanglingo sa maong pasangil ug nagkanayon nga "dili man na nako style".

Matud ni Gullas nga nakugang siya dihang nabati niya ang maong pasangil gikan ni kanhi Senador Sonny Osmeña.

Gitataw ni Gullas nga dili niya batasan ang modaot sa ubang mga tawo sukad sa iyang pagpanerbisyo sa publiko ug kung nagplano si John-John nga moatbang kaniya karong piniliay sa Mayo iya kining gihangop.

Si Gullas midungag nga bisan pa og mikuyog siya sa partidong KAMPI nagpabiling lig-on ang iyang baroganan ug respeto sa mga Osmeña ug wala niya hikalimti ang iyang kanhi kauban nga si Sonny sa partido Alayon.