Dili taga-MIG9 ang tulisan nga napatay

Dili sakop sa Military Intelligence Group 9 ang napatay nga gipasanginlang tulisan niadtong milabay’ng Huwebes sulod sa usa ka parlor diha sa sitio Tigbao, Talamban.

Si Sr.Supt. Patrociño Comendador nagkanayon nga ilang nasuta nga dili tinuod sakop sa Military Intelligence Group 9 si Rico Lumantas,57, base usab sa gihatag nga impormasyon sa MIG7 dinhi nga maoy ilang gihangyong makig-coordinate sa MIG9 kabahin sa pagkatawo niini.

Nakuha gikan sa posesyon ni Lumantas ang usa ka kalibre .45 nga pistola ug ID sa MIG9 nga nag-ingong siya sakop sa maong grupo isip civilian agent.

Gisusi usab sa kapolisan ang armas nga nasakmit gikan kang Lumantas ug mga armas usab nga nasakmit nga giingong gibilin sa duha ka mga nakaikyas nga kauban ni Lumantas diha sa balay sa usa ka opisyal sa barangay Pit-os.

Ang maong mga armas dili paltik ug dunay mga serial numbers ug gituohang posibleng duna kini rekord sa gobiyerno kung si kinsa ang tag-iya niini.

Usa sa mga gidudahang local contact ni Lumantas nga si Gerrjan Manago ang nadakpan ug nakuhaan og gibana-banang lima ka gramong shabu niadtong Biyernes sa gabii diha sa dalan Panagdait sa Kasambagan atol sa gihimong follow-up operations.

Samtang duha ka mga anak ni Lumantas nga sila si Chery Lumantas,19, ug Meoshe Joy Lumantas,20, miabot gikan sa San Pablo, Dumingjag sa Zamboanga del Sur aron kuhaon ang patay’ng lawas sa ilang amahan.

Si Rico napatay ni PO2 Antonio Din sakop sa Mobile Patrol Group human kini ug duha ka mga wala mailhing kauban misuway og tulis sa Jonas Borces Beauty Studio.

Ang mga tulisan wala makahibalong dunay kustomer nga polis diha sa maong dapit ug sa ilang pag-deklarar og tulis misukol si Din ug miresulta sa ilang sinukliay og bala ug pagkapatay ni Lumantas.

Sumala pang Inspector Michael Anthony Bastes, deputy chief sa Theft and Robbery Section sa mga tigbalita base sa gibutyag sa mga anak ni Lumantas nga kini mibiya sa ilang lugar niadtong Marso 12 ug nananghid nga mobisita sa ilang apuhan sa Ipil, Sibugay.

Misaad kini mobalik inig ka Marso 16 apan wala na kini makabalik. Gikatahong niadtong Sabado pa sila makadawat og report nga napatay ang ilang amahan dinhi sa Cebu.

Sumala pang Bastes gitug-anan siya sa magsuon nga mag-uuma ra ang ilang amahan diha sa ilang lugar ug wala makahibalong duna kini iligal nga mga kalihukan.