Mga reserbang ligid sulod sa mga PUJ nakahasol sa pasahero

Dili na unya tugutan sa konseho sa dakbayan sa Sugbu kadtong mga Public Utility Jeepney (PUJ) nga magbutang sa mga ligid sulod sa ilang gipamasahero ang sakyanan gumikan kay nakahatag og kahasol sa mga pasahero sa ilang paglingkod.

Kini maoy lakang nga iduso unya ni konsehal Arsenio Pacaña sa Konseho sa dakbayan sa Sugbu subay niining way insaktong desiplina sa mga drivers ug operators pagbutang sa mga ligid diha sulod sa PUJ diin tataw nga nakahasol sa mga sumasakay.

Si Pacaña miawhag sa buhatan sa City Traffic Operations Management(CITOM) nga susihon ang mga PUJ ug mohimo'g mga lakang nga mapangitaan og solusyon nga dili mahasol ang mga sumasakay.

Si Pacaña miingon nga salikwaot kaayong palandungon nga ang mga driver ug operators wala gyud maghunahuna sa kahimtang sa mga sumasakay nga dili na hinoon makalingkod og tarong gumikan sa mga reserbang ligid sulod sa PUJ.

Ang tinun-an ug mga trabahanteng sumasakay ilabi na ang mga kababayen-an nga magsul-ob lang og tradisyunal nga sapot maoy usa sa mga nahasol niini sumala pa sa konsehal.

Nanghinaot ang konsehal nga mahimoan gilayon kinig dinaliang aksyon sa mga kadagkuan og tinugyanan sa trapiko dinhi sa dakbayan sa Sugbu.