Hunta miawhag sa PNP nga hingusgan ang checkpoints vs. paltik

Giawhag sa Hunta Probinsyal sa lalawigan sa Sugbu ang kapolisan sa pagpahigayon sa ilang regular nga checkpoints sa kalungsoran ug sa component city sa lalawigan batok sa mga paltik nga mga armas.

Si Bokal Juan Bolo ug Jose Ma. Gastardo miduso sa maong lakang isip paghatag og igong suporta sa mga kadagkoan sa Police Regional Office (PRO) nga nimando na ngadto sa tanang mga police station dinhi sa Central Visayas nga mag-igmat sa ilang katungdanan pagpanakop niadtong mga dautang elemento nga tigpalusot og mga paltik nga pistola.

Si Bokal Bolo ug Gastardo nagkanayon nga angayang mopahigayon gyud sa subsob nga checkpoint sa kalungsoran gumikan kay dili ikalimod nga adunay mga dautang tawo nga mopalusot og mga illegal nga armas labi na ning nagsingabot nga eleksyon.

Usa sa nabaniog na kaayong lugar sa Sugbu diin daghang armas nga manghimoay og mga paltik mao ang dakbayan sa Danao.

Dugang pa niini nga gawas sa subsob nga pagpahigayon sa regular nga checkpoints, gikinahanglan unta nga ang mga kapolisan mohimo usab sa ilang subsob nga monitoring niadtong mga lugar diin init kaayo ang isyu sa mga managribal sa politika sa ingon mapatunhay ang kahapsay ug kalinaw sa nagkadaiyang dapit dinhi sa Central Visayas labi na sa lalawigan sa Sugbu.