Public hearing sa 13C route gitakda

Kadtong mga supak nga usbon ang rota sa mga PUJ nga nagbiyahe sa rota 13-C Talamban, giawhag nga mopadayag sa ilang sentimento sa public hearing karong Marso 28.

Giuyonan kagahapon sa konseho sa dakbayan nga ipahigayon ang public hearing kabahin sa gisugyot nga ordinansahon pag-usab sa rota sa mga PUJ sa Talamban.

Ang mga sakop sa committee on laws and ordinances nga gipangulohan ni Konsehal Edgardo Labella walay pagsupak sa gisugyot nga ordinansahon ni Konsehal Jocelyn Pesquera.

Kun maaprobahan g'yod ang gisugyot nga ordinansahon ni Konsehal Pesquera, kadtong mga PUJ nga nagdala sa rota 13-C permanente na nga adto mag-agi sa M.J. Cuenco Avenue dayon left turn sa Ayala Business Center sa pagbalik na nila paingon sa Talamban.

Matud ni Konsehal Labella nga dili kalapasan sa balaod ang gisugyot ni Pesquera nga pag-usab sa rota sa mga sakyanan nga nagdala sa rota nga 13-C kay ang katuyoan niini mao man ang pagsulbad sa kahuot sa mga sakyanan diha sa Gorordo Avenue.

Sa wala pa ipahigayon ang experimental rerouting sa mga PUJ nga nagbiyahean sa maong rota, ang mga PUJ nga nagbiyahean sa rotang 13-C adto moagi sa Gorordo Avenue inigbalik nila paingon sa Talamban.

Mga lider sa mga driver ug operator sa mga PUJ nga apektado sa pag-usab sa rota paingon sa Talamban giawhag nga motambong sa public hearing unya sa Marso 28.