Polis nanglabni gikulata

Usa ka polis sa Mandaue City Police Office (MCPO) ang gipasanginlang nanglabni og cellphone sa usa ka pasahero sa PUJ ug nakulatahan ug gidudahang napusilan sa iyang bitiis niadtong milabay'ng gabii diha sa dalan A.C. Cortes Avenue sa Ibabao, dakbayan sa Mandaue.

Giila ni PO1 Chester Quiros ang maong polis nga suspetsado sa pagpanglani og cellphone nga mao si PO1 Luis Martin Auman, hingkod ang panuigon ug nadestino isip beat patrol sa kapolisan sa maong dakbayan.

Matud pa ni PO1 Quiros nga positibong giila sa biktima nga si Estephane Kit Alaguier, 19 anyos, dalaga nga taga Sangi New Road sa Pajo, dakbayan sa Lapulapu si PO1 Auman nga maoy nilabni sa iyang 1100 Nokia cellphone sa sulod sa multicab nga ilang giluwanan.

Sumala pang Quiros nga ang drayber sa maong multicab nga si Joel Villa Miro, 24 anyos, ug ang konduktor niining si Ryan Abarquez maoy nakasaksi sa maong pagpanglabni ug mitabang usab sa paggukod ug pagdakop sa suspetsado.

Subay sa asoy sa mga saksi ug sa biktima, nagkapyot ang suspetsado sa multicab ug sa pag-abot sa maong dapit kalit lang niining gilabni ang cellphone ni Alaguier dayon miambak ug mikaratil og dagan.

Si Alaguier misinggit ug nangayog panabang hinungdan nga nakakuha og atensyon sa mga lumalabay. Sila si Gayo Gutang, 50 ug Dionesio Marie nga taga Sapa-Sapa, Ibabao nga nakadungog sa singgit daling misugat kang Auman ug mikulata kaniya.

Si SPO1 Pedro Sucion ug PO2 Joseph Andrin nga miresponde sa lugar nagkanayon nga duna silay nadungog nga buto sa armas ug dihang ilang gisusi, samdan na si Auman sa tiil.

Wala hinuon maklaro kung si kinsa ang mipusil kang Auman, apan usa sa gidudahan nga naunay kini sa iyang armas.

Nabawi gikan kang Auman ang cellphone sa biktima ug diha na nadiskubrehang polis kini tungod kay sulod sa gidala niining knapsack mao ang iyang PNP badge, ID sa PNP, posas ug mga bala lakip na ang kalibre .38 nga service revolver.

Sila si Gutang ug Marie nga maoy naabtang mikulata sa maong polis giapil og sikop tungod sa pagpamun-og ug gisusi pa karon kung lakip sila sa pasakaan og kaso.

Si Sr. Supt. Alexander Abadinas, direktor sa MCPO mitug-an sa Banat News nga gidisarmahan na si Auman ug higpit karong gibantayan sulod sa tambalanan diin kini gidala.

"Ang status niya karon is arrested and booked, wala na siya'y luna sa organization sa PNP, gipadisarmahan na siya ni RD (Chief Supt. Silverio Alarcio,Jr.) unya atong pasakaan og kasong administrative ug criminal, after siya makagawas sa hospital diretso na siya sa prisuhan," asoy pang Abadinas.

Sumala pang Abadinas ipailawom sa paraffin test ug drug test si Auman samtang ang iyang armas ipasusi sa PNP Crime Lab alang sa ballistics sanglit gikatahong dunay nag-ungot nga slug sa tiil niining mahimong susihon kung gikan ba kini sa iyang kaugalingong pusil.