Hangyo sa Kapitolyo gisalikway

Gisalikway ni Mayor Tomas Osmeña ang giduso nga traffic plan sa Kapitolyo alang sa Ciudad project niining tukoron diha sa Talamban-Banilad area aron unta libkason sa konseho sa siyudad sa Sugbu ang moratorium niining gipatuman sa konstruksyon sa bisan unsang edipisyo sa maong lugar.

Gibutyag ni Osmeña atol sa press conference kagahapon nga wala pa siya makadawat og kopya sa maong giduso nga traffic plan ug labaw sa tanan 'busy" siya ug walay higayon sa pag-atiman sa maong giduso nga traffic plan sa kagamhanan sa probinsya sa Sugbu.

Hinuon gipasalig sa mayor nga iyahang tun-an ang maong traffic plan sa higayon nga dili na siya busy pag-asikaso sa mga nag-unang transaksyon nga gihatagan karon niya og prayoridad.

Matud ni Osmeña iyaha pang paabuton ang subling pagbukas sa klase aron monitoron ang sitwasyon sa trapiko sa may Mango Avenue lahos sa Banilad kun gikinahanglan ba kini og daghang mga kausaban. -- Darrel Carumba Peace Summit ilusad sa PNP ug OMA

Dunay ipahigayong Peace Summit ang Office of the Muslim Affairs nga langkuban usab sa kapolisan, representante sa habig sa mga Sugbuanon, mga opisyales sa gobiyerno ug uban pa.

Si OMA regional director, Hajan Sakiran atol sa pulong-pulong kagahapon diha sa Police Regional Office 7 nagkanayon nga tuyo sa maong summit mao ang pagpalig-on sa relasyon sa mga Kristiyano ug Muslim nga anhi nanimuyo sa Sugbu.

Matud pang Sakiran kini aron mahibaw-an sa tagsa-tagsa ka sektor kung unsaon pagpuyo nga walay tensyon sa usa'g-usa aron malikayan ang dili pagsinabtanay.

Ang maong summit mahitabo una pa ang eleksyon sanglit usa sa mga tumong niini mao ang pagpadayag sa mga Muslim sa ilang intensyon nga makatampo sa pagpahigayon og malinawong piniliay karong Mayo.

Usa sa nakitang rason ni Sakiran nga sagad hinungdan sa di pagsinabtanay sa mga Muslim ug mga Kristiyano mao ang kawalay pagsalig sa usa'g-usa hinungdan nga gikinahanglan ang maong summit aron mahibaw-an sa matag sektor ang kultura sa isig ka habig.

Mipasabot si Sakiran nga mianhi dinhi ang mga Muslim gikan sa Mindanao aron manginabuhing malinawon.





Gihulagway sa komunidad sa mga Muslim nga nia dinhi nga malinawon ang Sugbu kung ikumparar sa mga nanghitabo karon sa Mindanao ug dili nila buot nga mohimo og kagubot sa mga taga Sugbu.

Mipasalig usab ang mga Muslim nga dili mahisama sa kagubot sa Mindanao ang eleksyon dinhi tungod lang sa ilang presensya.

"Rest assured that all the Muslim leaders here will not air the same atmosphere in Mindanao…let us trust each other and let us help one another for the good of our community,"asoy pang Sakiran.

Si Chief Supt. Ronald Roderos, ang Deputy Regional Director for Administration sa Police Regional Office 7 namahayag kagahapon nga suportahan sa kapolisan ang mga programa sa OMA.

Matud pang Roderos nga napamatud-an sa mga Muslim nga nia sa Sugbu ang ilang kooperasyon niadtong Asean Summit nga walay dautang nahitabo bisan sa mga hugon-hugon nga dunay mga teroristang gikan sa Mindanao nga nangabot.