Nahibaw-an sa gobernador nga ang orihinal nga presyo niini P16 mil matag poste apan gikataho nga adunay nahitabong over pricing diin ang matag poste gipatuboan og P85 mil ang matag usa.
Kada poste adunay nagkantidad og P95 mil ug P224 mil apan niining bag-o lang nadiskubrehan usab nga adunay mga poste nga mikabat sa P314 mil ug P350 mil ang kantidad matag usa.
Niining bag-o lang usab nasayran nga adunay 140 ka poste sa suga ang gipangtarok sa likod nga bahin sa mga decorative lamppost diha daplin sa karsada sa dakbayan sa Mandaue nga mibalor sa P44,849,999.68.
Base sa taho nga ang tanang mga poste nga gipatuboan pag-ayo ang presyo maoy giadurno diha daplin sa kadalanan sa Mandaue sukad niadtong pagpahigayon sa Asean summit.
Si Garcia miawhag nga palawman pa ang pakisusi sa maong mga anomaliya para mailhan ang nagpaluyo niini.
Sa laing bahin, niining bag-o lang si Valdemar Chiong, mayor sa lungsod sa Naga mipamatuod nga ang lamp post nga ilang gipangpanarok diha sa plaza sama og hitsura, kalidad ug panagway sa gipangbutang diha sa "ceremonial route" sa Asean summit ug P16 mil lang ang kantidad matag-usa niini sa milabay'ng tulo ka tuig.