Motor nasunog; 2 'habal' driver napaso

Nangapaso ang tibuok kalawasan sa duha ka habalhabal driver human masunog ang usa ka motorsiklo dihang nagkabangga kini pasado alas 6 sa miaging gabii sa Upper Poblacion, Alcoy.

Hinuon ang tagsa-tagsa ka sakay nga pasahero sa habalhabal gikatahong walay tatsa ang kalawasan dihang wala maapil pagkasunog.

Ang mga biktima kinsa daling gipanghatod sa Vicente Sotto Memorial Medical Center giila sa kapolisan nga si Carl Anova, 35, minyo ug residente sa Poblacion ug Ramonito Cecilio, nagpuyo sa Nug-as sa sama nga lungsod.

Suma pa nga si Anova nga nagmaneho sa iyang habalhabal ug may sakay kining pasahero nga si Aurelio Carigo, minyo ug residente sa Nug-as, apan pag-abot niya sa may kurbadahon nga dalan wala kini makabantay nga adunay laing motorsiklo nga nagtungas nga gimaneho usab ni Cecilo ug ang angkas niining si Bernardino Plando.

Si PO2 Dexter Basergo nga nahinabi sa Banat News niingon nga si Anova maoy mibangga ni Cecilio nga miresulta sa pagkasunog sa iyang motorsiklo ug nangapaso silang duha.

Ang duha ka biktima kasamtangan pang giatiman sa mga doktor sa nahisgutang tambalanan.

Samtang ang kapolisan wala pa makatino kun unsay hinungdan sa pagkasunog sa motorsiklo ni Anova sanglit nagpadayon pa man ang gihimong imbestigasyon.