Lakas-CMD mananapaw-Kampi

Gihulagway sa kadagkoan sa Kabalikat ng Malayang Pilipino (Kampi) sa Sugbu nga mananapaw ang partido Lakas ng Christian at Muslim Democrats (Lakas-CMD).

Kini human gitudlo ang ilang kandidato sa pagka-mayor sa dakbayan sa Mandaue, Jovito Thadeo "Jonkie" Ouano, isip city chairman sa Lakas-CMD.

Si Ouano kauban sa One Cebu Party nga nakig-alyansa sa Kampi sa kauluhan niadtong Pebrero 28.

"We are not surprised how Lakas works," nagkanayun si Atty. Pablo John Garcia, usa sa mga lider sa One Cebu-Kampi atol sa 888 News Forum sa Marco Polo Plaza Hotel kagahapon.

Gitumbok ni Garcia nga sama sa nahitabo sa tuig 2004 nga samtang ang iyang amahan nga si Gob. Pablo Garcia niadtong higayona ang tsirman sa partido Lakas sa Sugbu, ang kadagkoan sa partido Lakas sa kauluhan nihatag usab og nominasyon sa mga kandidato sa kaatbang ni Gob. Gwendolyn Garcia.

Sila si kanhi Kongresista Celestino Martinez Jr. ug kanhi Bise-Gob. John Henry Gregory Osmeña, nga mga kandidato sa pagka-gobernador ang parehong niangkon nga sakop usab sila sa partido Lakas.

Laing insidente nahitabo usab sa mga kandidato sa pagka-sakop sa hunta probinsiyal sa ikaunom nga distrito diin sila si Bokal Victor Maambong ug Manuel Masangkay ang kandidato sa mga Garcia apan si Bokal Gabriel Luis "Luigi" Quisumbing nakakuha usab og nominasyon sa partido Lakas sa kauluhan.

Gani gihimong rason ni Garcia ang walay klarong pagdumala sa partido Lakas sa ilang mga kandidato sa Sugbu sa miaging eleksiyon ang hinungdan sa ilang pagbiya sa partido Lakas human iyang gihulma ang One Cebu party.