Pablo John mipasangil nga walay nahimo sa 3rd District si Yapha

Gihulagway ni Capitol Consultant Atty. Pablo John Garcia nga si Kongresista Antonio Yapha sa ikatulong distrito sa lalawigan sa Sugbu way nahimo sa pagpanindot sa kadalanan sa iyang pagserbisyo sa Kongreso.

Kini maoy gipadayag ni Garcia atol sa gipahigayong 888 News Forum kagahapong adlawa diha sa may Marco Polo Plaza Hotel nga gipasagdan lang ni Yapha ang Ikatulong distrito hinungdan nga uwahi kaayo kini sa mga kalamboan.

Matud pa niini nga si Yapha way nahimo sa pagpa-aspalto sa ubang mga kadalanan diha sa lungsod sa Aloguinsan ug uban pang mga dapit bisan paman kun national road ang kadalanan sa Ikatulong distrito, responsibilidad kini sa usa ka kongresista ngadto sa iyang mga kunstituwente.

Apan si Yapha dihang gikuhaan og reaksyon sa Banat News nibali sa paghagit kang Pablo John nga suruyon ang mga lugar diha sa ikatulong distrito diin ang amahan niini nga si kanhi Gobernador Pablo Garcia naglingkod na sa 17 ka tuig sa probinsya dugang sa tulo ka tuig nga pamunoan sa igsuon niini nga si Gobernador Gwendolyn Garcia kun pila ka mga dalan ang ilang na-aspalto ug napatukod nga taytayan.

Matud pa ni Yapha nga siya maoy naka-aspalto sa kadalanan sa lungsod sa Asturias hangtud na sa lungsud sa Tuburan ug wa gyoy mga Garcia nga nakahimo niini.

Gani iyang gidugang nga kini maoy usa sa rason kun nganong gusto silang mobuwag sa lalawigan ug magtukod og laing probinsya gumikan kay ang gihatagan og pagtagad sa administrasyon mao lang ang Ikalima ug Ika-unom nga distrito sa lalawigan sa Sugbu.

Matud pa niya nga suroyon unta ni Pablo John ang lugar sa Ikatulong distrito ug personal nga kwentahon kun pila gyud ka mga proyekto ang nahatag sa mga Garcia sa ilang dapit una pa mobutyag nga wa siya magtagad.